Sup ź lasnych hryboŭ
Dla hetaha supu padyduć baraviki, padbiarozaviki abo maślaki.
19.08.2023 / 07:26
Spatrebicca:
- 600 h śviežych ci zamarožanych hryboŭ abo 70—100 h sušanych
- 1 litr bulonu (aharodninnaha, kurynaha, jałavičnaha)
- 1 vialikaja cybulina
- 4 siarednija bulbiny
- 2 siarednija morkvy
- 3 zubčyki časnaku
- žmienia śviežaha kropu
- 2 st. ł. aliŭkavaha aleju
- 3 st. ł. toplenaha masła
- 1 st. ł. pšaničnaj muki
- 3 st. ł. viarškoŭ 30%
- śpiecyi i travy: čajnaja łyžka majaranu, sol i pierac
Kab pryhatavać hrybny sup, vam spatrebicca 600 hramaŭ lasnych hryboŭ. Heta mohuć być baraviki, padbiarozaviki, maślaki. Kali vy budziecie hatavać apošnija, to pamiatajcie, što šapački treba ačyścić. Chutka pramyjcie i ačyścicie hryby. Narežcie ich na bolš drobnyja kavałački.
Taksama možna pryhatavać taki sup z zamarožanymi hrybami, jakija pierad užyvańniem, naturalna, treba razmarozić.
Kali vy chočacie vykarystać sušanyja hryby, to ich spatrebicca kala 70—100 hramaŭ. Takija hryby nieabchodna zahadzia zamačyć u vadzie na 12 hadzin (a lepš na ŭsiu noč).
Čytajcie: U Biełarusi baraviki źbirajuć tysiačami. A pačym pradajuć hryby?
Jak hatavać:
- Pačnicie nahravać patelniu siaredniaha pamieru. U jaje pakładzicie dźvie stałovyja łyžki aliŭkavaha aleju i dźvie stałovyja łyžki toplenaha masła (treciaja łyžka zastaniecca dla zapraŭki).
- Abiarycie bujnuju cybulinu i drobna narežcie. Pakładzicie na patelniu.
- Praź piać chvilin absmažvańnia dadajcie try ačyščanyja i narezanyja zubčyki časnaku.
- Usie hryby, narezanyja na drobnyja kavałački, pakładzicie na patelniu. Praciahvajcie smažyć 20 chvilin. Pa zakančeńni hetaha času dadajcie žmieniu narezanaha kropu, sol i pierac. Pieramiašajcie i źnimicie patelniu z ahniu.
- U kastrulu siaredniaha pamieru nalicie litr ci čatyry kubki aharodninnaha bulonu — jon najmienš tłusty. Adnak hrybny sup vydatna spałučajecca i z kurynym, i navat ź jałavičnym bulonam.
- U kipiačy bulon dadajcie ababranyja i drobna narezanyja morkvu i bulbu. Varycie sup na słabym ahni (pry zakrytaj nakryŭcy) 15 chvilin.
- Pa zakančeńni hetaha času dadajcie ŭ kastrulu ŭsio źmieściva patelni i čajnuju łyžku majaranu. Paśla piaci chvilin varki nastaŭ čas apošniaha etapu — dalikatnaha zabielvańnia i zahuścieńnia hrybnoha supu.
- Na patelniu pakładzicie stałovuju łyžku masła, nalicie dźvie stałovyja łyžki supu z kastruli i dadajcie stałovuju łyžku pšaničnaj muki. Zrabicie słaby ahoń i ŭsio pieramiešvajcie, pakul muka nie źmiašajecca z masłam i supam i nie pačnie pienicca. Taksama dadajcie try stałovyja łyžki 30% viarškoŭ. Adrazu ŭsio pieralicie ŭ kastrulu sa źlohku kipiačym supam. Praź dźvie chviliny hatavańnia sup možna vyklučyć.
- Hrybny sup možna zabialić i śmiatanaj 18%. Budźcie vielmi aściarožnyja, kab jana nie zhusła: spačatku možna asobna źmiašać sa śmiatanaj peŭnuju kolkaść supu, a potym pacichu ŭlivać hetu sumieś u kastrulu z supam.
- Praviercie smak pryhatavanaha supu i vyrašycie, ci vy chočacie dadać u jaho trochi bolš soli abo piercu.
Bolš receptaŭ: