Ці будзе беларускі рубель слабець далей? Тлумачыць эканаміст

Беларускі рубель аслаб. Толькі з пачатку месяца даляр падаражэў амаль на 15 капеек, або 5%, у параўнанні з курсам на 1 жніўня. «Наша Ніва» спытала ў эканаміста, чаму так адбываецца і ці захаваецца гэтая тэндэнцыя.

11.08.2023 / 08:06

Эксперт BEROC Настасся Лузгіна адзначае, што цяпер мы ў першую чаргу бачым адгалоскі таго, што адбываецца на расійскім валютным рынку.

«Расійскі рубель зніжаецца да даляра і еўра. Bloomberg уключыў рубель у тройку найгоршых валют. За год ён аслабеў амаль на чвэрць», — адзначае эканаміст.

Беларускі рубель у сваю чаргу паўтарае траекторыю рубля расейскага. За выключэннем таргоў чацвярга, беларускі рубель умацоўваўся ў дачыненні да расійскай валюты.

Сярод прычын, чаму прасядаюць рубель расійскі, эканаміст называе наступныя моманты.

Рост цэнаў на нафту можа прывесці да росту рубля

«Асноўны фактар, чаму так адбываецца з рублём у тым, што ў РФ значна горшае сальда бягучага рахунку. Паказчык пакуль застаецца станоўчы, але ён скараціўся ў некалькі разоў. Валюты на рынак выходзіць нашмат менш, чым год таму. У дадатак да гэтага ідзе вывад капітал з Расіі. Расце попыт на куплю валюты з боку насельніцтва. Усё гэта аказвае ціск на валютны рынак», — тлумачыць Лузгіна.

Гаворачы аб прагнозах, эканаміст не выключае, што ўжо да канца жніўня можа адбыцца адкат, калі будзе адбывацца ўмацаванне рубля расійскага, а за ім і беларускага.

«Чакаецца заканчэнне падатковага перыяду, што будзе стымуляваць экспарцёраў прадаваць больш валюты. Гэта можа падтрымаць курс. У дадатак да гэтага патроху растуць цэны на нафту. Усё гэта можа стаць стымулам для таго, каб прынамсі яго падзенне спынілася».

Сярод іншага эканаміст адзначае, што на стабілізацыю можа паўплываць і рашэнне Цэнтрабанка павысіць ўліковую стаўку (аналаг стаўкі рэфінансавання ў РБ).

Усё гэта, на думку эксперта, можа дапамагчы расейскаму рублю не пераступіць мяжу 100 рублёў за 1 даляр.

Тым не менш, на курс рубля беларускага могуць аказваць уплыў не толькі знешнія фактары, як прасяданне рубля расійскага, але і ўнутраныя.

У беларускай эканоміцы крызісу няма

У беларускай эканоміцы таксама пачынае праглядацца тэндэнцыя да скарачэння пазітыўнага сальда ў гандлёвым балансе па таварах і паслугах.

«У знешнім гандлі таварамі мы маем адмоўныя паказчыкі, але ў гандлі паслугамі — традыцыйна ў плюсе, таму ў цэлым сальда станоўчае, але яно ўжо далёка не такое вясёлкавае, як гэта было год таму.

Што з сальда ўсё было ў парадку пацвярджаў і той факт, што ў нас павялічыліся золатавалютныя рэзервы. Таму пакуль нельга казаць пра крызісныя сітуацыі менавіта ўнутры беларускай эканомікі», — кажа Лузгіна.

Аднак, на думку эканаміста, калі будзе мець працяг стымулюючая грашова-крэдытная палітыка, а заробкі працягнуць актыўна расці, то цалкам магчыма, што ўжо ў бліжэйшыя месяцы будзе адмоўнае сальда гандлёвага балансу, якое будзе аказваць уплыў на курс беларускага рубля. У такім выпадку на паслабленне нацыянальнай валюты будзе аказваць уплыў не толькі расійскі фактар, але і ўнутраны.

Чытайце таксама:

Кліенты давернага кіравання судзіліся з Альфа-Банкам, але грошай не вярнулі. Што вырашыў суд? 

У Беларусі ўжо некалькі гадоў ажыятаж на банкаўскія ячэйкі. У чым прычына?

 

Даніла Луцкевіч