За два дні праз марафон «Нам не ўсё адно» сабралі каля 574 000 еўра
Марафон незалежных медыя і арганізацый пачаўся раніцай у суботу, 29 ліпеня. Данаціць, як меркавалася, можна было да 23:59 30 ліпеня. Рубеж у 500 000 еўра пераадолелі 30 ліпеня ў 16:45, канчатковая сабраная сума да канца заяўленага часу — каля 574 000 еўра. Праўда, пасля заканчэння заяўленага часу збору данаты працягвалі паступаць.
31.07.2023 / 00:07
Вынікі збору сродкаў пераўзышлі ўсе самыя смелыя чаканні. Напачатку марафона нават самі ягоныя арганізатары прызнаваліся, што разлічваюць на некалькі дзясяткаў тысяч даляраў, хоць першапачатковая мінімальная планка была пастаўленая на 200 тысяч еўра.
Упершыню пра 500 тысяч еўра як мэту сказала падчас выступлення ў эфіры марафону Святлана Ціханоўская. Тады яшчэ не былі сабраныя і 200 тысяч, але дынаміка збору паказвала, што сабраць іх рэальна. У выніку аказалася, што нават 500 тысяч, якія здаваліся фантастычнымі — не мяжа.