U Šviecyi prajšoŭ sud nad Hretaj Tunbierh. Prysud byŭ vielmi cikavy
abnoŭlena
Klimatyčnaja aktyvistka Hreta Tunbierh paŭstała ŭ paniadziełak pierad sudom pa abvinavačvańni ŭ niepadparadkavańni palicyi padčas pratestu na poŭdni Šviecyi ŭ minułym miesiacy, paviedamlaje AP.
24.07.2023 / 12:47
Hreta Tunbierh. AP Photo / Lewis Joly, File
Tunbierh i inšyja aktyvisty byli zatrymanyja paśla taho, jak 19 červienia jany spynili ruch na naftavym terminale ŭ porcie Malmio.
Pavodle zajavy pres-sakratara šviedskaj prakuratury Aniki Kolin i zajavy prakuroraŭ, Tunbierh vystavili abvinavačvańni praz toje, što jana admoviłasia vykanać zahad palicyi pakinuć miesca pratestu padčas akcyi.
Prakuror Šarłota Atasen paviedamiła, što za złačynstva niepadparadkavańnia zvyčajna karajuć štrafami.
Tunbierh pryznała, što ŭdzielničała ŭ akcyi pratestu i nie vykanała zahadu palicyi, ale nie pryznała siabie vinavataj i zajaviła, što dziejničała ź nieabchodnaści.
«Maje dziejańni apraŭdanyja. Ja liču, što my znachodzimsia ŭ nadzvyčajnaj situacyi, jakaja pahražaje žyćciu, zdaroŭju i majomaści. Nieźličonaja kolkaść ludziej i supolnaściaŭ znachodziacca pad pahrozaj jak u karotkaterminovaj, tak i ŭ doŭhaterminovaj pierśpiektyvie», — zajaviła jana sudu.
Zrešty, sud abviaściŭ, što jana prysudžanaja da štodzionnaha štrafu za niepadparadkavańnie pravaachoŭnym orhanam. Havorka idzie pra 30 štodzionnych štrafaŭ pa 50 šviedskich kron (kala 4,50 jeŭra). Akramia taho, jana pavinna apłacić 1000 šviedskich kron (kala 87 jeŭra) u Fond dapamohi achviaram złačynstvaŭ.
Za miežami suda Hreta Tunbierh sustrełasia z presaj i nazvała prysud absurdnym.
«Absurdna, što tyja, chto dziejničaje ŭ adpaviednaści z navukaj, pavinny płacić za heta canu… Pakul pramysłovaść vykapniovaha paliva moža spalić našu sučasnaść i budučyniu», — zajaviła jana.
Hreta adznačyła, što budzie praciahvać svaje akcyi. Jana taksama zajaviła, što nie budzie padavać apielacyju na prysud.
Tunbierh natchniła hłabalny moładzievy ruch, jaki patrabuje ŭzmacnieńnia baraćby sa źmianieńniem klimatu, paśla taho, jak z 2018 hoda ładziła štotydniovyja akcyi pratestu pad ścienami šviedskaha parłamienta.
Razam ź joj buduć sudzić jašče troch čałaviek.