U jakich minskich łaźniach jość chamam i dzie pastaviać džakuzi
U čatyroch hramadskich łaźniach stalicy adkryty chamam. Naviedvalnaść niekatorych ź ich vyrasła na 15-20%.
20.07.2023 / 11:36
Chamam u «Łaźni» na vuł. Marjeŭskaj. Fota: gbm.by
«Hetyja nievialikija tureckija łaźni, u jakich padtrymlivajecca 100-pracentnaja vilhotnaść i siaredniaja tempieratura da 50 hradusaŭ, akazalisia vielmi zapatrabavanyja», — raskazaŭ dyrektar pradpryjemstva «Haradskija łaźni» Anatol Marčanka ahienctvu «Minsk-Naviny».
Pieršy chamam źjaviŭsia na pačatku 2022 hoda ŭ łaźnieva-azdaraŭlenčym kompleksie «Łaźnia» na vuł. Marjeŭskaj. U kancy 2022-ha adkryŭsia ŭ składzie novaha spa-kompleksu ŭ łaźni № 8 na vuł. V. Charužaj i ŭ kompleksie «Sucharava», a ŭ mai hetaha hoda — u «Łaźni № 1» na vuł. Chmialnickaha. U pryvatnaści, u dvuch apošnich padraździaleńniach dziakujučy novym abjektam naviedvalnaść amal adrazu pavialičyłasia na 15-20% — heta adbiłasia na statystycy pieršaha paŭhodździa.
Čamu nie stvarajuć tureckija kutki i ŭ inšych łaźniach?
«Jość niuansy, — adkazaŭ na heta Anatol Marčanka. — Chamam metazhodna ŭładkoŭvać i dla mužčyn, i dla žančyn, a adzinaje miesca ŭ łaźni, dzie jany sychodziacca, — heta basiejn. Jany jość tolki ŭ łaźnievych kompleksach. Tamu pobač z basiejnam i stvarajem chamam u asobnym pamiaškańni dla ahulnaha naviedvańnia. Naprykład, łaźnia № 7 na vuł. Maskoŭskaj vielmi zapatrabavanaja. Ale ŭ joj z-za adsutnaści basiejna pryjšłosia b stvarać dva tureckija kutki — u mužčynskim i žanočym adździaleńniach, pieraabstalavać najaŭnyja płoščy».
Razam z tym, u 7-j łaźni vosieńniu płanujecca ŭstalavać u ahulnych adździaleńniach džakuzi — biez asobnaj płaty: košt pasłuhi budzie ŭvachodzić u košt kvitka na 2-hadzinny sieans pa anałohii z naviedvańniem chamama ŭ łaźnievych kompleksach, paviedamiŭ Marčanka.