Пасол Турцыі падзякаваў Лукашэнку і парламенту за падтрымку падчас спробы перавароту ў 2016 годзе
Турцыя днямі адсвяткавала Дзень дэмакратыі і нацыянальнага адзінства — сёмую гадавіну няўдалай спробы дзяржаўнага перавароту. Гэты факт адзначыў амбасадар Турцыі ў Беларусі Мустафа Азджан на мерапрыемстве ў Мінску, піша БелТА.
19.07.2023 / 07:32
Рэджэп Таіп Эрдаган. Фота: Paul Ellis Pool / Getty Images
«Такія краіны, як Беларусь, сяброўствам з якімі мы ганарымся, добра ведаючы, што з сябе на самай справе ўяўляе FETO (арганізацыя прыхільнікаў апазіцыйнага дзеяча Фетхулаха Гюлена. — «НН»), з першых імгненняў спробы перавароту аказалі нашай краіне моцную падтрымку, прадэманстравалі, што не на словах, а на справе з'яўляюцца нашымі сябрамі. У гэтым кантэксце ад імя маёй краіны і ад імя нашага паважанага прэзідэнта я выказваю падзяку паважанаму спадару Лукашэнку і парламенту Беларусі», — сказаў пасол Турцыі.
***
Увечары 15 ліпеня і ноччу 16 ліпеня ў Турцыі адбыліся падзеі, калі частка турэцкіх вайскоўцаў распачала спробу здзейсніць ваенны пераварот у краіне, узяўшы пад свой кантроль шэраг стратэгічна важных аб'ектаў. Лічыцца, што матывам дзеянняў вайскоўцаў была незадаволенасць узмацненнем асабістай улады Эрдагана і яго палітыкай ісламізацыі. Турэцкая армія гістарычна лічылася галоўнай апорай свецкага характару дзяржавы.
Захапіць прэзідэнта, які быў у гэты час у адпачынку на міжземнаморскім курорце ў Мармарысе, змоўшчыкам не ўдалося. Ён прыляцеў у Стамбул і звярнуўся да нацыі па тэлебачанні. На вуліцы гарадоў выйшлі яго прыхільнікі, якія ўступілі ў канфрантацыю з вайскоўцамі.
Самалёты F-16 з авіябазы Акынджы тройчы абстралялі будынак парламента, а таксама дарогу каля прэзідэнцкага палаца і штаб-кватэры спецназа і паліцыі Анкары. У выніку гэтых удараў загінулі 68 чалавек і больш за 200 былі параненыя.
На наступны дзень мяцежныя вайскоўцы капітулявалі.
Пасля спробы перавароту прэзідэнт Эрдаган правёў у краіне масавую чыстку. Было звольнена каля 100 тысяч дзяржаўных служачых, выкладчыкаў і суддзяў, звыш 2,5 тысячы чалавек прысуджаныя да пажыццёвага зняволення.