Ścipły hienij ź ispanskaj vioski. Chto taki Karłas Alkaras — małady pieramožca Uimbłdana
20-hadovy Karłas Alkaras — novy tryumfatar Uimbłdana i najmaładziejšaja pieršaja rakietka śvietu. Na šlachu da trafieja ispaniec vynies samoha Novaka Džokaviča ź jaho pieramožnaj sieryjaj, dy zaadno staŭ najmaładziejšym tenisistam, jaki ŭziaŭ i Uimbłdan, i inšy znakavy turnir — US Open. Što ž heta za novy talent?
17.07.2023 / 17:59
Alkaras na korcie Uimbłdana. Fota: AP Photo / Kirsty Wigglesworth
Pra Alkarasa ŭpieršyniu zahavaryli jašče letaś. Tady 19-hadovy chłopiec uziaŭ kubak prestyžnaha turniru US Open, vybiŭšy ŭ finale narviežca Kaśpiera Ruŭda, i ŭvarvaŭsia na pieršy radok u suśvietnym tenisnym rejtynhu. Na pačatku 2023-ha Karłas prapuściŭ Australian Open praz traŭmu nahi, i Džokavič znoŭ viarnuŭsia na pieršaje miesca ŭ śviecie, ale ciapier ispanski vunderkind znoŭ u lidarach.
Alkaras rodam z Mursii — heta rehijon na paŭdniovym uschodzie Ispanii. Chłopca nazvali ŭ honar baćki.
Karłas Alkaras-starejšy taksama byŭ tenisistam i navat vyjhraŭ na pačatku 90-ch čempijanat Ispanii siarod 15-hadovych spartoŭcaŭ. Ale padviali abstaviny: kab raźvivacca dalej, chłopcu treba było pierajazdžać u tenisnuju akademiju Łuisa Bruhiery ŭ pradmieści Barsiełony. Navučańnie ŭ akademii kaštavała 40 tysiač piesiet (kala 250 jeŭra) na miesiac, i baćki Karłasa-starejšaha nie mieli takich hrošaj. Tamu jon zastaŭsia ŭ rodnaj vioscy El-Palmar i tam raźvivaŭ tenis.
Budučy pieramožca Uimbłdana rodam sa šmatdzietnaj siamji — u jaho troje bratoŭ, kožny ź ich taksama ŭ niejkaj stupieni cikavicca tenisam. Kali chłopčyku było try hady, baćka padaryŭ jamu tenisnuju rakietku. Jak kaža Alkaras, «ja naradziŭsia z tenisam u kryvi».
Ale nie tenisam adzinym — u dziacinstvie Karłas hulaŭ u mini-futboł. Luboŭ da miača jon zachavaŭ dahetul, chłopiec padtrymlivaje futbolny kłub «Reał Madryd». Jon taksama pryznajecca ŭ lubovi da šachmat: «Nieabchodnaść kancentravacca, hulać suprać kahości inšaha, stratehija — nieabchodnaść dumać zahadzia. Dumaju, usio heta duža padobnaje da tenisnaha korta».
Da 12 hadoŭ Karłas vyjhraŭ usie dziciačyja turniry ŭ rodnaj pravincyi, u toj ža čas u padletka źjaviŭsia svoj ahient. U 15 jon pastupiŭ u tenisnuju akademiju Equelite i pačaŭ pracavać z trenieram Chuanam Karłasam Fierera — byłoj pieršaj rakietkaj śvietu i pieramožcam «Rałan Harosa».
Nieŭzabavie chłopiec atrymaŭ status prafiesijanała i staŭ padbiracca da vialikšych turniraŭ. Status čempijona Jeŭropy pa tenisie, debiut u asnoŭnaj sietcy ATP (Asacyjacyja tenisistaŭ-prafiesijanałaŭ) i miesca ŭ top-250 rejtynhu ATP, traplańnie ŭ asnoŭnuju sietku Australian Open i pieršy tytuł ATP — usio heta prymusiła tenisnych ekśpiertaŭ havaryć pra Alkarasa jak pra novuju zorku. A voś šyrokuju viadomaść jon atrymaŭ paśla US Open — 2021, dzie dajšoŭ da čverćfinału i syšoŭ z dystancyi tolki praz traŭmu.
U 2022-m pajšli pieramohi na bujnych turnirach. Spačatku adznačym Miami Masters, a potym Madrid Open, dzie juny ispaniec paśladoŭna abyhraŭ top-try suśvietnaha rejtynhu na toj čas: svajho kumira Rafaela Nadala, Novaka Džokaviča i Alaksandra Źvierava. A potym byŭ čarhovy US Open, paśla jakoha Karłas uźlacieŭ na viaršyniu suśvietnaha rejtynhu. Jon uvohule duža chutka jaho skaryŭ: na kaniec 2019-ha ispaniec zajmaŭ 492-je miesca ŭ rejtynhu, praz hod — 141-je, na kaniec 2021-ha — 32-je i jašče praz hod — pieršaje. Zdajecca, mała chto sumniavajecca, što tryumfalny šlach Karłasa na hetym nie skončany.
Što ŭnikalnaha ŭ jaho hulni? Karłas spałučaje ŭ siabie śmiełaść na korcie, zdolnaść da ŭdaraŭ roznaj dalnaści, hibkaść u taktycy, styl, moc i aryhinalnaść. Jon moža skakać na korcie, niby na batucie, u jaho cudoŭnaja druhaja padača, dyj prosta jon hulaje tak, što za hetym cikava nazirać.
Zornyja supierniki Alkarasa adhukajucca pra jaho vielmi kamplemientarna. Toj ža Džokavič, jakoha ispanski hienij skaryŭ na takim važnym dla jaho «Uimbłdanie», adhukaŭsia pra maładziona tak: «Ja nikoli nie hulaŭ z takim hulcom, jak jon. u Rodžera [Fiederera] i Rafy [Nadala] jość svaje mocnyja i słabyja baki. Karłas — duža celny hulec. U im jość najlepšyja elemienty ad mianie, Rafy i Rodžera». A Nadal, dziciačy kumir Alkarasa, uvohule kazaŭ, što chłopca «nie spynić»: «Jon maje ŭsie składniki dla fajnaj karjery. Jon maje žadańnie. Jon dastatkova ścipły, kab ciažka pracavać. Jon dobry chłopiec».
Pieršy koŭč tenisista Chuan Karłas Fierer aściarožniejšy ŭ acenkach padapiečnaha: «Dumaju, Karłas maje jakaści, što dajuć jamu nadta dobryja mahčymaści być adnym z najlepšych u historyi. Heta jasna dla mianie. Ale vidavočna, što šmat čaho moža zdarycca. Jon małady. Jość šmat rečaŭ, jakija jon nie bačyć. My ŭsie viedajem, jakija isnujuć ryzyki: viečaryny, adciahvańnie ŭvahi, adsutnaść kancentracyi na tenisie. Kali ty možaš sustrakacca z bahatymi i znakamitymi, lohka stracić aryjentacyju».
Małady ispaniec raskazvaŭ, što pracavaŭ ź psichołaham, i što heta jamu mocna dapamahło. Jon zhadvaje, jak u vieku 15-16 hadoŭ nie byŭ zdolny strymlivać emocyi na korcie: naprykład, kidaŭ rakietku ci navat łamaŭ jaje. Ciapier chłopiec pryznajecca, što dla jaho važna prychodzić na kort z uśmieškaj i ščaślivym, a jašče nie paddavacca cisku i zachoŭvać rassłableny stan, atrymlivać zadavalnieńnie ad hulni.
Talenavity junak — nie zaŭsiodnik śvieckaj chroniki. Jon nie traplaje ŭ skandały, i dakładna nieviadoma, što adbyvajecca ŭ jaho asabistym žyćci. U lutym 2023-ha Karłas upeŭnivaŭ, što ŭžo 18 miesiacaŭ jon adziny: «Ciažka znajści čałavieka, jaki moža padzialać z taboj žyćcio, kali vy zaŭsiody ŭ roznych častkach śvietu». U volny čas, akramia sportu, maładzion vučyć anhlijskuju movu i hladzić filmy, asabliva adznačaje tvory ŭ žanry saśpiens i matyvacyjnyja stužki — naprykład, jaho matyvuje Silviestr Stałone ŭ roli Roki.
Chłopiec nie abychodzicca biez kapryzaŭ — jon źbiraje krasoŭki ad Nike. Hetaja firma daje Alkarasu ekipiroŭku, tak što, zdajecca, prablem z krasoŭkami być nie pavinna. Adnak ispaniec źbiraje vintažnyja najki, tyja, što i kaštujuć niamała, i jakija niaprosta znajści. Stanam na luty kalekcyja tenisista składałasia prykładna z 20 par.
Sam Karłas reziumiruje svoj šlach prosta: «Ja zaŭsiody byŭ talenavitym chłopcam. Ale ja i zaŭsiody ciažka pracavaŭ. Bo kali ty talenavity i nie robiš namahańniaŭ, ty nikudy nie pryjdzieš». Ciapier jon musić nie spynicca na zdabytych pieramohach i padtrymlivać uzrovień dalej, bo nie tak składana stać numaram adzin, jak zachoŭvać lidarstva. Praciahvać imknucca da pieramohi — voś što Alkaras ličyć duža niaprostym.
Što jon płanuje z hetym rabić? «Źbirajusia praciahnuć žadać spraŭdžvańnia majoj mary, navat kali ja jaje ŭžo spraŭdziŭ».
Niejmavierny ŭdar u padzieńni na Uimbłdanie rasijskaha tenisista VIDEA
U papularnym amierykanskim sieryjale i novym «Avatary» syhrała dačka biełaruskaj tenisistki