Rasijanie zaminiravali terytoryi hłybinioj da 15 km. Jakija ciažkaści raźminiravańnia pieraadolvajuć ukraincy padčas kontrnastupu
Kontrnastupleńnie Ukrainy prasoŭvajecca pavolna, bo terytoryi pierad rasijskimi abarončymi ŭmacavańniami ščylna zaminiravanyja. Napiaredadni kontrnastupleńnia Ukraina atrymała mienš za 15% ad usiaho sapiornaha i inžyniernaha abstalavańnia, jakoje prasiła ŭ zachodnich partnioraŭ. Pra heta piša «UP» sa spasyłkaju na The Washington Post.
16.07.2023 / 08:59
Ukrainskija sałdaty abstrelvajuć rasijskija pazicyi z tranšei na linii frontu ŭ Zaparožskaj vobłaści, Ukraina, piatnica, 23 červienia 2023 h. Fota: AP Photo / Efrem Lukatsky, File
«Pa słovach sałdat, praciahłaja padrychtoŭka da kontrnastupleńnia, jakoje pačałosia kala miesiaca tamu na mnohich učastkach pola boju na ŭschodzie i poŭdni Ukrainy, dała rasiejcam čas na padrychtoŭku.
Terytoryi hłybinioj ad 3 da 10 mil (kala 5-16 km — red.) pierad asnoŭnymi apornymi punktami rasijanaŭ byli ščylna zaminiravanyja supraćtankavymi i supraćpiachotnymi minami i raściažkami. Pa ich słovach, hetyja abarončyja zbudavańni paśpiachova strymlivajuć ukrainski nastup.
U vyniku, pa słovach ukrainskich vajskoŭcaŭ, ukrainskija siły źmianili stratehiju.
Zamiest taho, kab sprabavać prarvacca z dapamohaj bajavych mašyn piachoty i bajavych tankaŭ, jakija zachodnija sajuźniki pieradali Ukrainie dla kontrnastupleńnia, padraździaleńni prasoŭvajucca napierad pavolna, pieššu».
Jak piša WP, baraćba Ukrainy na minnych palach vyjaviła ŭraźlivaść bronietransparcioraŭ i tankaŭ — asabliva amierykanskich bajavych mašyn «Bredli» i niamieckich tankaŭ «Leapard», jakija aficyjnyja asoby ličyli klučavymi dla Ukrainy, kab advajavać akupavanuju rasijanami terytoryju.
«Hetyja mašyny atrymali stanoŭčyja vodhuki ad sałdat: navat paśla padryvu na minach bolšaść ludziej, jakija znachodzilisia ŭ ich, vyžyvajuć, atrymlivajučy tolki niaznačnyja ranieńni, ale jany nie zmahli samastojna prarvać rasijskuju abaronu», — piša hazieta.
Pa słovach Hałoŭnakamandujučaha USU Valeryja Załužnaha, Ukrainie treba śpiecyjalnaje dystancyjnaje abstalavańnie dla raźminiravańnia. U intervju WP jon raskazaŭ, što Ukraina vykarystoŭvaje pieradadzienyja ZŠA sistemy M58 Mine Clearing Line Charge (MICLIC), ale «jany taksama źniščajucca», a tamu «ich treba šmat».
Vysokapastaŭleny ŭkrainski čynoŭnik, jaki razmaŭlaŭ z WP na ŭmovach ananimnaści, raskazaŭ, što Kijeŭ atrymaŭ mienš za 15% ad toj kolkaści sapiornaha i inžyniernaha abstalavańnia, u tym liku MICLIC, jakoje prasiŭ u zachodnich partnioraŭ napiaredadni kontrnastupleńnia.
Častka hetaha abstalavańnia prybyła tolki na minułym tydni, jak paviedamiŭ čynoŭnik.
Ministr abarony Ukrainy Alaksiej Reźnikaŭ i Załužny paviedamili WP, što jany prainfarmavali svaich zachodnich kaleh pra toje, što im terminova treba bolš sistem raźminiravańnia, takich jak tarpiednyja vybuchovyja zarady «Banhałor».
«Minnyja pali — heta adna z prablem, jakaja, biezumoŭna, upłyvaje na tempy nastupleńnia. Heta prablema, jakuju my bačym. Ci možna było jaje vyrašyć chutčej? Možna było. Jak jaje možna było b vyrašyć? Hienierał Mili (staršynia Abjadnanaha kamiteta načalnikaŭ štaboŭ ZŠA Mark Mili — red.) viedaje. Inšaje pytańnie: ci moža jon u hetym dapamahčy? Ja nie viedaju», — skazaŭ Załužny.
Amierykanskija aficyjnyja asoby zajavili WP, što jany dali Ukrainie amal usie vidy abstalavańnia, jakija jana prasiła napiaredadni kontrnastupleńnia. Čynoŭniki adznačyli, što nie zaŭsiody mahčyma dać tuju kolkaść, jakuju prosić Ukraina, ale skazali, što, u pryvatnaści pa sistemach MICLIC, Vašynhton pracuje nad tym, kab nieŭzabavie dać bolš nie tolki samoj sistemy, ale i zaradaŭ, jakija jana vykarystoŭvaje dla padryvu doŭhich šerahaŭ min.
Čynoŭniki taksama paviedamili haziecie, što rašeńnie ZŠA pieradać Ukrainie sprečnyja kasietnyja bojeprypasy daść Kijevu ahniavuju pieravahu, što dazvolić ukrainskim vajskoŭcam mieć dastatkova času i prastory dla vykarystańnia najaŭnaha ŭ ich inžyniernaha abstalavańnia.
Ukrainskija vajskoŭcy, jakija ŭdzielničajuć u kontrnastupleńni, raskazali WP, što, pakolki sistem raźminiravańnia vielmi mała, jany stali lohkaj mišeńniu dla rasijskich vojskaŭ, jakija pryjarytetna nanosiać udary pa ich.
Jak adznačaje hazieta, hłybinia i ščylnaść minnych paloŭ stała značnaj prablemaj uzdoŭž paŭdniovaj linii frontu ŭ Zaparožskaj vobłaści, dzie rasijanie čakali, što ŭkraincy pojduć u ataku i pasprabujuć pierarezać suchaputny kalidor praz akupavany rehijon, jaki złučaje rasijskuju miažu z Krymam.
«Miascovaść u hetym rajonie — heta pieravažna adkrytyja pali, dzie ŭkraincam nie było dzie zamaskiravać svaju bujnuju techniku i transpartnyja srodki. Pa słovach sałdat, rasijanie abrali dla svaich pazicyj uzvyšša», — piša WP.
Kamandzir inžynierna-sapiornaha padraździaleńnia 47-j miechanizavanaj bryhady z pazyŭnym Oskar raskazaŭ WP, što jaho hrupa atrymała niamiecki tank dla raźminiravańnia Wisent, jaki vykarystoŭvała pierad pačatkam kontrnastupleńnia ŭ Zaparožskaj vobłaści. Hety tank i padobnyja savieckija madeli paśpiachova raźminiravali niekatoryja šlachi dla pieršaha nastupu padraździaleńniaŭ bryhady.
«Ale ciapier ich vykarystańnie ŭžo nieefiektyŭnaje, tamu što vorah čakaje źjaŭleńnia takoj techniki — masiŭnaj, šumnaj, takoj, jakuju lohka zaŭvažyć i pa jakoj lohka, adpaviedna, nanieści ŭdar», — skazaŭ Oskar.
Inšy aficer 47-j bryhady raskazaŭ WP, što ŭ pieršy dzień kontrnastupleńnia niekatoryja padraździaleńni bryhady na bajavych mašynach «Bredli» i tankach «Leapard» pamyłkova vybrali niapravilny maršrut, trapiŭšy na minnaje pole, zamiest taho, jakoje zahadzia padrychtavali sapiory.
Napieradzie kałony, jak raskazvaje hazieta, išli mašyny raźminiravańnia, ale hrupa była vymušanaja spynicca, kali mašyny, jakija jechali zzadu, niečakana natknulisia na miny i apynulisia ŭ pastcy. Tady rasijanie pačali atakavać ukraincaŭ ź viertalotaŭ i supraćtankavymi rakietami, surjozna paškodziŭšy i źniščyŭšy niekalki BTRaŭ i tankaŭ. Pa słovach ukrainskaha aficera, niekatorym padraździaleńniam, jakija pakinuli svaju techniku, usio ž udałosia zachapić rasijskija akopnyja pazicyi.
«Kali vorah bačyć pierad saboj navat tank «Leapard» i śpiecyjalnuju inžyniernuju techniku, jon u pieršuju čarhu źniščyć śpiectechniku. Tamu što bieź jaje ŭsie astatnija nie projduć. Tolki za niekalki dzion nastupleńnia było źniščana niekalki takich mašyn razam z ekipažami», — raskazaŭ aficer.
Pakolki rasijanie z dapamohaj bieśpiłotnikaŭ, jak piša WP, vyšukvajuć sistemy raźminiravańnia, kab urazić ich artyleryjaj i rakietami, ukraincy sprabujuć uručnuju vykonvać pracy pa raźminiravańni.
«Sapiornyja padraździaleńni — časam hrupa ŭsiaho z čatyroch čałaviek — časta čakajuć źmiarkańnia, kab rasčyścić šlachi, pakolki dniom jany zanadta prykmietnyja, a ŭ ciemry ich možna ŭbačyć z dapamohaj pryboraŭ načnoha bačańnia», — apaviadaje hazieta.
Sapiory raskazali WP, što chadzić ź mietałašukalnikam nierealna, tamu što jany zanadta prykmietnyja, a tamu jany poŭzajuć, šukajučy miny.
«Heta nas vielmi zapavolvaje, tamu što rabota sapiora patrabuje času i spakoju. U takich umovach vykonvać našu rabotu niemahčyma», — skazaŭ padpałkoŭnik Mikałaj Maroz, kamandzir inžynierna-sapiornaha bataljona 128-j horna-šturmavoj bryhady.
Akramia taho, jak piša hazieta, rasijanie skidajuć ź bieśpiłotnikaŭ miny na ŭčastki, jakija ačyścili ŭkrainskija sapiory, a pazicyi, da jakich dabirajucca ŭkraincy, mohuć być užo zaminiravanyja.
Pakolki ŭkrainskija sałdaty pierasoŭvajucca pieššu, a nie na novaj zachodniaj technicy, papaŭniać zapasy bojeprypasaŭ i evakujavać paranienych stała bolš składana, jak dadaje WP.
«My rychtavalisia, ale rasijanie taksama rychtavalisia. Jany razumiejuć, što inžyniernaja technika ciapier vyrašaje klučavuju prablemu i mianiaje praviły hulni, tamu jany chočuć źniščyć jaje pieršaj. Ja skiravaŭ jašče adzin list usim našym partnioram, kab jany zaraz zasiarodzilisia na hetym», — reziumavaŭ ministr abarony Ukrainy Alaksiej Reźnikaŭ.