Piakielny tryp biełaruskich futbalistaŭ pa Jeŭropie: 1600 kiłamietraŭ za dvoje sutak u aŭtobusie
Futbalisty hrodzienskaha «Niomana» dvoje sutak dabiralisia ŭ Lichtenštejn na aŭtobusie. Tam im u čaćvier treba budzie zhulać matč Lihi kanfierencyj UEFA suprać miascovaha «Vaduca».
12.07.2023 / 14:39
«My na miescy. Hatel Kommod», — paviedamiła pres-słužba «Niomana» 12 lipienia ŭ 11:58 pavodle minskaha času.
Hatel Kommod znachodzicca ŭ abščynie Ruhiel. Adlehłaść pamiž joj i Hrodna — kala 1600 km. Pres-słužba «Niomana» napisała pra vyjezd u 08:35 10 lipienia. Na darohu kamanda vydatkavała dvoje sutak.
Pry hetym padarožža pieraryvałasia na načoŭki. Pieršuju noč hrodziency praviali ŭ Polščy, druhuju — u Aŭstryi, jak piša Blizko.by.
Dabiracca ŭ Lichtenštejn na aŭtobusie pryjšłosia, bo z 2021 hoda, paśla prymusovaj pasadki ŭ Minsku rejsu Afiny — Vilnia i aryštu Ramana Pratasieviča i Safii Sapiehi, u Biełarusi adsutničajuć avijasuviazi z bolšaściu jeŭrapiejskich krain.
Minskaje «Dynama» i BATE, jakija taksama vystupajuć u jeŭrakubkach, adpravilisia na matčy samalotami, ale ź pierasadkami. Hrodziency ž addali pieravahu naziemnamu transpartu.
U «Niomanie» padličyli, što adlehłaść pamiž stadyjonami kamand składaje 1630 km, ale čakać ź vizitam u adkaz haściej ź Lichtenštejna nie varta. Z sakavika 2022-ha biełaruskim kłubam i zbornym dazvolena pravodzić chatnija matčy ŭ mižnarodnych turnirach tolki na niejtralnych stadyjonach i biez hledačoŭ, tamu druhaja hulnia projdzie ŭ vienhierskim Djory.
Matč «Vaduc» — «Nioman» projdzie na stadyjonie «Rajnpark» u Vaducy 13 lipienia i pačniecca a 21:00 pa biełaruskim časie.
Čytajcie taksama:
Futbalist z čempijanatu Biełarusi pierachodzić u kamandu numar dva ŭ Francyi. Jak takoje mahčyma?
Lehienda futbolnaha «Niomana», jakoha niadaŭna zatrymlivali, pakinuŭ kłub