Kasietnyja bojeprypasy źmieniać praviły hulni ŭ baraćbie suprać Rasii — ministr abarony Ukrainy
Pavodle słoŭ Alaksieja Reźnikava, partniory Ukrainy taksama buduć prainfarmavanyja ab prymianieńni i dziejańni kasietnych bojeprypasaŭ.
12.07.2023 / 13:40
Alaksiej Reźnikaŭ. Fota ź jaho fejsbuka
Kijeŭ ličyć, što vykarystańnie kasietnych bojeprypasaŭ dazvolić źmianić praviły hulni ŭ baraćbie z rasijskimi vojskami. Pra heta zajaviŭ ministr abarony Ukrainy Alaksiej Reźnikaŭ u kułuarach samitu NATA, jak piša «Ukrainskaja praŭda».
Vystupajučy ŭ kułuarach samitu NATA, ministr adchiliŭ niezadavalnieńnie niekatorych krain i humanitarnych hrup adnosna pryniataj na minułym tydni ŭradam ZŠA pastanovy ab pastaŭkach Ukrainie hetaj sprečnaj zbroi.
Reźnikaŭ padkreśliŭ, što ŭžyvańnie hetaj zbroi budzie abmiežavana niekatorymi rajonami na terytoryi Ukrainy. Pavodle jaho słoŭ, partniory Ukrainy taksama buduć prainfarmavanyja ab prymianieńni i dziejańni kasietnych bojeprypasaŭ.
«Kali my atrymali ŭ mai 2022 hoda 155-milimietrovyja artyleryjskija sistemy, heta stała pierałomnym momantam. U lipieni my atrymali roznyja typy [reaktyŭnych sistem załpavaha ahniu], heta stała nastupnym krokam napierad… I ja spadziajusia, što kasietnyja bojeprypasy [stanuć] nastupnym praryvam u jakaści zbroi abo bojeprypasaŭ dla vyzvaleńnia našych časova akupavanych terytoryj».
Kasietnyja bomby zabaronienyja ŭ mnohich krainach, ale nie ŭ ZŠA, Ukrainie i Rasii. Jany skidajuć vybuchovyja bomby dla źniščeńnia sałdat praciŭnika na vialikaj terytoryi, adnak nierazarvanyja bojeprypasy mohuć nieści doŭhaterminovuju pahrozu dla cyvilnaha nasielnictva.
Rasija ŭžyvaje svaje kasietnyja bojeprypasy suprać Ukrainy z momantu svajho poŭnamaštabnaha ŭvarvańnia ŭ krainu bolš za hod tamu.