Suprać Rasii i jaje zładziejaŭ pačali dziejničać mietadami Masada. Zabojstva Ržyckaha
U Krasnadary zastrelili Stanisłava Ržyckaha — namieśnika načalnika haradskoha adździeła mabilizacyjnaj pracy, kapitana 2-ha ranhu. Raniej jon byŭ kamandziram padvodnaj łodki «Krasnadar», ź jakoj zapuskali kryłatyja rakiety pa Ukrainie.
11.07.2023 / 19:37
Stanisłaŭ Ržycki, adstaŭny kamandzir padłodki «Krasnadar»
14 lipienia 4-hadovaja Liza Dźmitryjeva z mamaj išli na zaniatki da łahapieda ŭ samym centry ŭkrainskaha horada Vińnica. U dziaŭčynki byŭ sindrom Daŭna, paŭhadovaj jana pieražyła składanuju apieracyju na sercy. Iryna Dźmitryjeva pryśviaciła ŭsio svajo žyćcio, kab vychadzić dačušku.
U hety dzień rasijanie ŭdaryli kryłatymi rakietami pa Vińnicy. Heta byŭ razhar taho pieryjadu, kali Maskva spadziavałasia pastavić Ukrainu na kaleni bambiožkami haradoŭ, jakija vialisia z troch kirunkaŭ: ź Biełarusi z poŭnačy, z Rasii z uschodu i z Čornaha mora z poŭdnia. «Kalibr» u Vińnicu prylacieŭ z Čornaha mora.
Liza zahinuła imhnienna. Mamu z traŭmaj žyvata špitalizavali.
Žachlivyja kadry ablacieli śviet. Na adnym ź ich niežyvoje dzicia. Pobač lažyć adarvanaja naha darosłaha.
Usiaho tady ŭ Vińnicy zahinuła 24 čałavieki, siarod ich troje dziaciej, 202 čałavieki byli paranienyja.
Ukrainskija rasśledavalniki pryjšli da vysnovy, što «Kalibry» pa Vińnicy byli vypuščanyja z padłodki «Krasnadar». Aficyjnaj cellu byŭ Dom aficeraŭ, adnak dakładnaść rasijskich rakiet nievysokaja navat pa aficyjnych paramietrach. Da taho ž abstreł byŭ siarod biełaha dnia, kali ŭ centry horada była ścižma narodu: Vińnica ž u hłybokim tyle, ludzi adčuvali siabie ŭ biaśpiecy, horad pryniaŭ tysiačy ŭciekačoŭ z uschodu, poŭdnia i poŭnačy krainy.
Abstaviny zabojstva Stanisłava Ržyckaha
Nieviadomy padłaviŭ 42-hadovaha Stanisłava Ržyckaha na ranišniaj prabiežcy. U marskoha aficera strelili niekalki razoŭ u śpinu i hrudzi. Jon zahinuŭ na miescy napadu.
Zabojcy mahli adsačyć Ržyckaha praz aplikacyju dla biehunoŭ Strava — toj pastajanna vykładaŭ u sieciva svaje zabiehi. Pryčym zaŭsiody pa adnolkavym maršrucie.
Palicyja Krasnadara paśpieła ahučyć prykmiety mahčymaha zabojcy. Paźniej, 11 lipienia, rasijskija miedyja zajavili pra zatrymańnie padazravanaha ŭ zabojstvie — 64-hadovaha Siarhieja Dzienisienki, zasłužanaha majstra sportu pa karate, prezidenta Fiederacyi šatakan karate-do Ukrainy.
Rasijskija telehram-kanały adznačajuć, što z padvodnaj łodki Ržycki zvolniŭsia praz abstaviny słužby.
Apošnija hady jon pa dzieviać miesiacaŭ płavaŭ u Mižziemnym mory, praz što ŭ jaho raspałasia dva šluby.
HUR Ukrainy ŭzmacniaje padazreńni
Napiaredadni zabojstva Ržyckaha Hałoŭnaje ŭpraŭleńnie raźviedki Ministerstva abarony Ukrainy apublikavała intryhujučaje videa pad nazvaj «Nastaŭ čas adpłaty».
Dalej ukrainskaja vajskovaja raźviedka apublikavała paviedamleńnie pra zabojstva Ržyckaha, dzie ździekliva padzialiłasia nieviadomymi šyrokaj publicy abstavinami. U pryvatnaści, što ŭ jaho strelili nie čatyry, a siem razoŭ. Nazvali i zbroju — pistalet Makarava.
Tym nie mienš adkaznaść za zabojstva vajennaha praciŭnika HUR na siabie nie ŭziało.
Taktyka Masada suprać Rasii?
Rasijskija miedyja paśpiašalisia akreślić likvidacyju Ržyckaha «taktykaj Masada». Tut u ich vyjšła ahavorka pa Frejdu, bo Izrail sapraŭdy viadzie palavańnie na svaich vorahaŭ-terarystaŭ.
Adnak vyhladaje, što, chutčej, rusijanie sutyknulisia ź dziejańniem staroj mudraści: «Što pasieješ, toje i pažnieš». Suprać Maskvy vykarystoŭvajuć jaje ŭłasnuju taktyku — akcyi pramoha dziejańnia. Kali, viadoma, ukrainskija śpiecsłužby sapraŭdy datyčnyja da zabojstva Ržyckaha.
Daradca kiraŭnika Ofisa prezidenta Ukrainy Michaił Padalak zajaviŭ, što rasijskija dobraachvotniki, jakija ładziać dyviersii na terytoryi Rasii, bolš nie ŭvachodziać u skład USU.
Sproby zamachu na kamandziraŭ ATA, supracoŭnikaŭ śpiecsłužbaŭ i lotčykaŭ dobra viadomyja va ŭkrainskim hramadstvie. Tolki kiraŭnik vajskovaj raźviedki Kiryła Budanaŭ pieražyŭ 10 zamachaŭ.
Rasijanie achvotna raspaviadajuć, jak jany nibyta likvidavali kryłatymi rakietami «Kalibr» Valeryja Załužnaha i Kiryłu Budanava. Paśla čaho tyja sapraŭdy na niekatory čas źnikli z publičnaj prastory, napeŭna, z patreb biaśpieki.
Tajemnaja vajna Rasii z Zachadam i z Ukrainaj viadziecca daŭno. Dastatkova ŭzhadać zabojstva Alaksandra Litvinienki ŭ Vialikabrytanii, sprobu zabojstva Siarhieja Skrypala. Paśla 2022 hoda jana nabyła sistemny charaktar. A ciapier Kreml vyklikaŭ na siabie adkaz z vykarystańniem tym samych srodkaŭ. Zahinuli prapahandysty Darja Duhina i Uładlen Tatarski, byŭ ciažka paranieny rasijski nieanacyst Zachar Prylepin. A Stanisłaŭ Ržycki — pieršy zabity adstaŭny rasijski kamandzir.