Recept bułačak, jakija nikoli nie čarśćviejuć — takija pieradajuć palitviaźniam
Partał Politzek Times dzielicca receptam zdobnych bułačak chakajda z kurahoj i razynkami ź ciesta, jakoje nikoli nie čarśćvieje. Takuju vypiečku nieabyjakavyja biełarusy pieradajuć zatrymanym u SIZA.
03.07.2023 / 21:00
Dla tanhdžonh (kisiel, jaki robić ciesta dalikatnym i pulchnym):
- 130 h małaka,
- 20 h muki.
Dla ciesta:
- 130 h małaka,
- 2—2,5 st. ł. cukru,
- 30 h žyvych draždžej (10 h suchich),
- 400 h muki,
- 1 č. ł. soli,
- 1 jajka,
- 1 st. ł. śmiatany,
- 2 st. ł. aleju,
- 30 h miakkaha masła.
U 130 h małaka ŭmiašajcie vienčykam stałovuju łyžku muki i, pastajanna pamiešvajučy, zavarycie na plicie tanhdžonh. Prykryjcie nakryŭkaj i trochi astudzicie.
U nastupnych 130 h ciopłaha małaka rastvarycie cukar i droždžy, pastupova dadavajcie paru łyžak muki z ahulnaj kolkaści. Kali padymiecca šapačka draždžej, uviadzicie ŭ sumieś tanhdžonh, jajka, alej, śmiatanu i sol, źmiašajcie i pačnicie častkami dadavać muku. Kali ciesta pierastaje brać muku, vymiesicie jaho 3—5 chvilin miksieram abo rukami.
Zmažcie ciesta masłam i miasicie jašče chviliny try. Pakińcie jaho ŭ ciaple. Kali abjom ciesta pavialičycca ŭ 2-3 razy, jano hatova. Z hetaha ciesta možna zrabić piražki, a možna — bułački. Recept bułačak budzie nižej.
Bułački chakajda z kurahoj i razynkami
Raskačajcie ciesta ŭ pramavuholnik, pasypcie źlohku cukram, narezanaj kurahoj, razynkami, akuratna zharnicie ŭ rulet, zaščypajcie ŭzdoŭž. Pieraviarnicie švom uniz, razrežcie na lubuju kolkaść kavałkaŭ i pakładzicie bułački na blachu pad ručnik chvilin na 40—45. Razahrejcie duchoŭku da 190° na režymie vierch-niz. Zmažcie bułački sumieśsiu žaŭtka napałovu z małakom i piačycie 20—25 chvilin. Hatoŭnaść vyznačajecca pa kolery. Dastańcie hatovyja bułački, prykryjcie ich ručnikom, kab skarynačka była miakkaj.
Kali vy lubicie bułački z karycaj, to da 2 st. ł. cukru treba dadać čajnuju łyžku karycy i pasypać raskačanaje ciesta hetaj sumieśsiu.
I jašče z hetaha ciesta atrymlivajucca i smažanyja, i piečanyja piražki adnolkava dobra. Načynka moža być luboj.