Orban: Pryjdzie čas, kali słabyja narody zahinuć, a mocnyja vyžyvuć
Premjer-ministr Vienhryi vystupiŭ z čarhovaj rezanansnaj zajavaj.
01.07.2023 / 15:15
Viktar Orban vitajecca z prezidentam Francyi Emanuelem Makronam. Fota: Thierry Monasse / Getty Images
«Epicentr ziemlatrusu znachodzicca zusim pobač. Vialikaja vajna našaha času adbyvajecca pa susiedstvie ź Vienhryjaj, u toj čas jak dziasiatki i sotni tysiač mihrantaŭ z poŭdnia šturmujuć našy miežy, i nam patrebnaja mocnaja kraina, urad, ekanomika, armija i, što nie mienš važna, mocnyja pravaachoŭnyja orhany. Nam treba treniravacca i ŭzbrojvacca, pryjduć časy, kali słabyja zahinuć, a mocnyja zastanucca. Tamu nam nieabchodna kožny dzień umacoŭvać našu ŭłasnuju abaronu i pravaachoŭnyja orhany. Siońnia Vienhryja ci nie samaja biaśpiečnaja kraina ŭ Jeŭropie. My ŭsie možam hanarycca hetym, my hanarymsia hetym», — skazaŭ premjer Vienhryi na cyrymonii adkryćcia fakulteta prava Nacyjanalnaha ŭniviersiteta dziaržaŭnaj słužby, dzie buduć rychtavać siłavikoŭ.
U sieradu Orban zajaviŭ u intervju Bild, što Ukraina pierastała być suvierennaj dziaržavaj.
Palityk kazaŭ, što vystupaje za chutčejšaje spynieńnie ahniu va Ukrainie.
«Ale sapraŭdy važna toje, što chočuć rabić amierykancy. Ukraina bolš nie suvierennaja dziaržava. U ich niama hrošaj. U ich niama zbroi. Jany mohuć vajavać tolki tamu, što my ich padtrymlivajem na Zachadzie. Tamu kali amierykancy vyrašać, što chočuć miru, mir budzie», — skazaŭ vienhierski premjer.
Orban skazaŭ, što viera ŭ zdolnaści Ukrainy vyjhrać vajnu — heta poŭnaje nierazumieńnie situacyi.
«Ja dumaju, što razumieńnie, što ŭkraincy zmahajucca na pieradavoj, a my padtrymlivajem ich finansava, infarmacyjaj, instrumientami i što jany mohuć vyjhrać vajnu suprać Rasii, — heta niapravilnaje ŭśviedamleńnie situacyi. Heta niemahčyma… Ja kažu pra kaniec vajny, i prablema ŭ tym, što va ŭkraincaŭ skončacca sałdaty raniej, čym u rasiejcaŭ, i heta budzie vyrašalnym faktaram», — skazaŭ Orban.
Ministr zamiežnych spraŭ Ukrainy Dźmitryj Kuleba prakamientavaŭ raniejšyja śćviardžeńni nastupnym čynam: «Usio heta prosta bła-bła-bła».