Зяленскі: Быў на фронце, гэта шчаслівы дзень — на ўсіх кірунках было прасоўванне
Прэзідэнт Украіны паведаміў, што ён быў рады падзякаваць украінскім ваярам асабіста. Пра гэта Уладзімір Зяленскі паведаміў падчас начнога відэазвароту, запісанага з цягніка, як піша «Украінская праўда».
27.06.2023 / 06:37
Фота з тэлеграм-канала Уладзіміра Зяленскага
«Сёння — фронт. Данеччына, Запарожжа. Нашы воіны, нашы перадавыя пазіцыі, напрамкі актыўных дзеянняў на фронце. Сёння на ўсіх напрамках у нашых воінаў было прасоўванне наперад, і гэты шчаслівы дзень. Я зычу хлопцам больш такіх дзён».
Зяленскі расказаў, што 26 чэрвеня быў у падраздзяленнях «Хорціцы», якія гераічна вызначыліся ў бітве за Бахмут, далей — у «вельмі магутных, вельмі акуратных» марпехах, затым − у «Таўрыі», на Паўднёвым фронце.
Фота з тэлеграм-канала Уладзіміра Зяленскага
Ён таксама дадаў, што правёў нарады з генераламі Васілём Зубанічам, Аляксандрам Тарнаўскім, Юрыем Модулем і Аляксандрам Сырскім, на якіх прынялі некалькі аператыўных рашэнняў.
А таксама яшчэ раз абмеркавалі стварэнне Корпуса марской пяхоты.
Фота з тэлеграм-канала Уладзіміра Зяленскага
Акрамя таго, па словах Зяленскага, ён меў перамовы з партнёрамі, у прыватнасці з прэзідэнтам ЗША Джо Байдэнам, перш за ўсё пра пастаўкі зброі.
Злева ад Зяленскага кіраўнік Офіса прэзідэнта Андрэй Ярмак. Фота з тэлеграм-канала Уладзіміра Зяленскага
«Насычаны дзень, шмат эмоцый. Меў гонар узнагародзіць нашых воінаў, падзякаваць асабіста, паціснуць руку. Дзякуй за ўсе вашы словы падтрымкі, хлопцы! Дзякуй за абдымкі — вельмі цёплыя — усім сёння. І дзякуй за вашы шаўроны. Гэта надзвычай ганарова для мяне, пра кожны шаўрон раскажу асобна. Усе нашы воіны — ад салдата, матроса да генерала — малайцы!» — падсумаваў прэзідэнт.