«Фенаменальны выбар Прыгожына…» Падаляк — пра мецяж кіраўніка ПВК Вагнера і карысць ад яго
Дарадца кіраўніка офіса прэзідэнта Украіны Міхаіл Падаляк пракаментаваў рашэнне кіраўніка ПВК Вагнера Яўгена Прыгожына спыніць ваенны мяцеж і так званы «марш справядлівасці» на Маскву.
25.06.2023 / 08:12
Прыгожын з'язжае з Растова. Фота: прэсс-служба ПВК «Вагнер»
«Фенаменальны выбар Прыгожына… Ты амаль абнуліў Пуціна, узяў пад кантроль цэнтральныя органы ўлады, дайшоў да Масквы і раптам… здаеш назад. Бо адзін вельмі спецыфічны пасярэднік з сумнеўнай рэпутацыяй (Лукашэнка) паабяцаў гарантыі бяспекі ад чалавека (Пуціна), які раніцай аддаў загад аб тваім знішчэнні. І з-за таго страху, які зведала пуцінская эліта за апошнія 24 гадзіны, гэты загад абавязкова будзе выкананы… Хаця не без карысці: Прыгожын прынізіў Пуціна/дзяржаву і паказаў, што манаполіі на гвалт больш няма», — напісаў прадстаўнік офіса Зяленскага ў твітары.
Раней аб мецяжы Прыгожына ў сваім штовячэрнім звароце выказаўся прэзідэнт Украіны.
«Сёння свет убачыў, што гаспадары Расіі нічога не кантралююць. Наогул нічога. Проста поўны хаос. Поўная адсутнасць нейкай прадказальнасці. І гэта на расійскай тэрыторыі, якая нашпігаваная зброяй», — сказаў Уладзімір Зяленскі.
Ён перайшоў на расійскую мову і звярнуўся да расейцаў: «Чалавек з Крамля, відавочна, вельмі баіцца і, напэўна, хаваецца дзесьці, не паказваецца. Упэўнены, ён ужо не ў Маскве. Тэлефануе кудысьці, выпрошвае там нешта…
Ён ведае, чаго баіцца, бо ён сам стварыў гэтую пагрозу. Усё зло, усе страты, уся нянавісць — ён гэта сам распаўсюджвае. І чым даўжэй ён зможа перабягаць паміж сваімі бункерамі — тым больш страціце вы ўсе… усе, хто звязаны з Расіяй».
Заснавальнік ПВК «Вагнер» Яўген Прыгожын увечары 23 чэрвеня пачаў вайсковы пераварот у Расіі, назваўшы яго «маршам справядлівасці».
Ранкам 24 чэрвеня найміты захапілі Растоў-на-Доне і накіравалі калону ў напрамку Масквы.
Яўген Прыгожын патрабаваў выдаць міністра абароны Сяргея Шайгу і начальніка Генштаба Валерыя Герасімава, абвінавачваючы іх у злачынным кіраванні расійскай арміяй.
ФСБ узбудзіла супраць Прыгожына крымінальную справу аб ваенным мецяжы. Уладзімір Пуцін, а ўслед за ім і іншыя расійскія афіцыйныя асобы назвалі тое, што адбываецца, здрадай.
Увечары 24 чэрвеня прэс-служба Аляксандра Лукашэнкі абвясціла, што Прыгожын падчас перамоваў з ім пагадзіўся спыніць наймітаў.
Услед за гэтым Прыгожын абвясціў, што найміты разгортваюць свае калоны і «сыходзяць у зваротным кірунку ў палявыя лагеры згодна з планам».
У Крамлі заявілі, што крымінальную справу супраць Прыгожына спыняць, а сам ён зʼедзе ў Беларусь.
Чытайце таксама:
«Вайна патрэбная была, каб купка жывёлін папіярылася». Прыгожын даў рэзананснае інтэрв’ю, у якім падвёў грунт пад спыненне вайны
Прыгожын у Растове. Што вядома на гэты момант пра «мяцеж Прыгожына»
«Удар у спіну». Пуцін выступіў са зваротам да вайскоўцаў і насельніцтва