Miedyku z Hrodna dali piać hadoŭ kałonii ŭzmocnienaha režymu
U sudzie Kastryčnickaha rajona Hrodna 22 červienia vyniesieny prysud pa kryminalnaj spravie 24-hadovaha miedyka Artura Chłusa, abvinavačanaha va ŭdziele ŭ masavych biesparadkach (č. 2 art. 293 Kryminalnaha kodeksa).
22.06.2023 / 13:47
Spravu pieršapačatkova razhladaŭ sudździa Dźmitryj Kiedal, ale paśla praciahłaha pierapynku pryznačyli inšaha sudździu — Marharytu Łancevič, jak piša «Viasna».
Palitźniavoleny Artur Chłus da svajho zatrymańnia pracavaŭ fielčaram hrodzienskaj bryhady chutkaj dapamohi i byŭ studentam Hrodzienskaha dziaržaŭnaha miedycynskaha ŭniviersiteta. Artur rodam ź Pinska. Vučyŭsia ŭ Słonimskim miedycynskim kaledžy, skončyŭ jaho z čyrvonym dypłomam i pa zakančeńni raźmierkavaŭsia ŭ Hrodna.
Jaho zatrymali 22 kastryčnika 2022 hoda za rehistracyju ŭ płanie «Pieramoha» i za ŭdzieł u pratestach. Da suda Artura źmiaścili ŭ SIZA hrodzienskaj turmy №1.
Razhlad spravy palitźniavolenaha pačaŭsia 27 lutaha 2023 hoda, ale pa nieviadomaj pakul pryčynie sud prypynili da maja.
19 maja 2023 hoda KDB dadaŭ palitźniavolenaha ŭ śpis «asob, jakija majuć dačynieńnie da terarystyčnaj dziejnaści».
Sud pryznaŭ Artura Chłusa vinavatym i pakaraŭ pazbaŭleńniem voli na piać hadoŭ u kałonii va ŭmovach uzmocnienaha režymu.
Čytajcie taksama: