Historyja ź miljonam rubloŭ za «padbity tank» moža być fejkam — «Ahientstvo»
Žurnalisty vydańnia «Ahientstvo» źviarnuli ŭvahu na navinu ab atrymańni vajskoŭcam Andrejem Kraŭcovym hrašovaj vypłaty ŭ pamiery adnaho miljona rubloŭ za toje, što toj nibyta padbiŭ niamiecki tank. «Ahientstvo» adznačaje, što ŭ hetaj historyi jość niekalki niestykovak.
21.06.2023 / 15:21
Pucin naviedaŭ Centralny vajskovy kliničny špital imia A. Višnieŭskaha Ministerstva abarony Rasijskaj Fiederacyi, dzie prachodziać lačeńnie vajskoŭcy Uzbrojenych sił, jakija atrymali ranieńni va Ukrainie. Fota: kremlin.ru
12 červienia vajskoviec Andrej Kraŭcoŭ atrymaŭ z ruk Uładzimira Pucina orden Mužnaści. Padčas razmovy ni Pucin, ni vajskoviec nie zhadvali «padbity tank».
Sustreča Andreja Kraŭcova z Uładzimiram Pucinym prajšła ŭsiaho praź niekalki dzion paśla pieršych paviedamleńniaŭ ab padbitych tankach.
A pieršaje videa, na jakim vidać paškodžańni tanka Leopard, Minabarony apublikavała 8 červienia — za čatyry dni da sustrečy Pucina z vajskoŭcam.
Na videa z Andrejem Kraŭcovym sa špitala možna zaŭvažyć, što ŭ vajskoŭca amputavana ruka. Pa słovach byłoha chirurha, ź jakim pahutaryli žurnalisty «Ahientstva», takaja apieracyja moža doŭžycca kala dźviuch hadzin, jašče kala dvuch dzion nieabchodna na adnaŭleńnie.
Ranieńnie Andrej Kraŭcoŭ, mahčyma, atrymaŭ u Zaparožskaj vobłaści — mienavita tam pa danych prajekta Ukraine Weapons Tracker nie paźniej za 8 červienia padbili pieršy tank Leopard. Adpaviedna, usiaho za čatyry dni vajskoŭca pavinny byli dastavić u špital, praapieryravać i pieravieźci ŭ Padmaskoŭje.
Taksama, jak adznačaje vydańnie, usie, chto sustrakajecca z Uładzimiram Pucinym, dahetul abaviazanyja prachodzić jak minimum dvuchtydniovy karancin. Na videa sa špitala, apublikavanym 12 červienia, Uładzimir Pucin nie trymaje dystancyi, razmaŭlajučy z vajskoŭcami.
Ab uručeńni miljona rubloŭ za padbity Leopard Minabarony paviedamiła napiaredadni. Heta pieršy vypadak takoha ŭznaharodžańnia.
Hrošy ŭručyŭ sienatar Alaksandr Karelin, patłumačyŭšy, što heta hrošy ad «sibirskich pradprymalnikaŭ». U publikacyi Minabarony havorycca, što srodki vydzieliŭ fond «Zabota Sibiri». Žurnalist Dźmitryj Kolezieŭ źviarnuŭ uvahu, što takoha fondu jurydyčna nie isnuje.
Čytajcie taksama:
Pientahon adkazaŭ Šajhu, jaki baicca ŭdaraŭ HIMARS i Storm Shadow pa Krymie
Apieracyja idzie zhodna z płanam: Załužny ŭpieršyniu apublikavaŭ VIDEA vizitu na pieradavuju
Kreml zabaraniŭ rehijonam publikavać niekrałohi zahinułym va Ukrainie rasijskim vajskoŭcam