«Piša, ale na volu ničoha pieradać nie moža». U źniavolenaha Uładzimira Mackieviča ŭ turmie źjavilisia prablemy sa zdaroŭjem
Žonka fiłosafa Uładzimira Mackieviča raspaviała «Narodnaj Voli» pra naviny ad muža.
08.06.2023 / 15:48
Uładzimir Mackievič niekalki sutak u lutym 2022 hoda trymaŭ haładoŭku pratestu
Uładzimir Mackievič — biełaruski fiłosaf i mietadołah byŭ zatrymany 4 žniŭnia 2021 hoda. Jamu vystavili abvinavačańnie ŭ «arhanizacyi dziejańniaŭ, jakija hruba parušajuć hramadski paradak» (art. 342 KK). Adnak kančatkovaje abvinavačańnie było ŭžo pa troch artykułach Kryminalnaha kodeksa. U vyniku Mackievič byŭ asudžany da piaci hadoŭ źniavoleńnia ŭ kałonii ŭzmocnienaha režymu.
Spačatku źniavoleny fiłosaf adbyvaŭ pakarańnie ŭ Škłoŭskaj PK № 17, ale napačatku hetaha hoda jamu źmianili režym utrmańnia na bolš žorstki i pieraviali ŭ mahiloŭskuju turmu № 4.
MUS uklučyŭ Uładzimira Mackieviča u śpis asob, jakija datyčnyja da ekstremisckaj dziejnaści.
— Vałodzia trymajecca, chacia sa zdaroŭjem u jaho jość peŭnyja prablemy, — kaža Śviatłana Mackievič, žonka fiłosafa. — Nie budu ničoha kankretyzavać, niachaj heta budzie miedycynskaj tajnaj.
Advakat da muža naviedvajecca nie vielmi časta, ale, prynamsi, takija vizity nie admianiajucca. I heta ŭžo dobra.
— Praciahvaje za kratami niešta pisać?
— Dumaju, tak, ale na volu pieradavać jon ničoha nie moža z taho, što napisaŭ. Treba ž razumieć, što heta — turma, a nie kałonija. Tamu nieviadoma jašče, nakolki jość umovy, kab tam niešta pisać. I ja navat nie viedaju, kolki čałaviek u kamiery z mužam, jak jamu tam davodzicca. Nakolki ja razumieju, u turmie źniavolenyja nie pracujuć, a pa režymie vychodziać tolki na prahułku.
Uvohule ž, pytańnie znachodžańnia ŭ turmie — heta ŭ pieršuju čarhu pytańnie zdaroŭja. A 14 maja Uładzimiru spoŭniłasia ŭžo 67 hadoŭ.
Čytajcie taksama:
Fiłosafa Mackieviča pieraviali z kałonii ŭ mahiloŭskuju turmu. Blizkija nie viedajuć, na jaki termin
Uładzimiru Mackieviču vynieśli prysud — 5 hadoŭ uzmocnienaha režymu