Čat-boty sa štučnym intelektam pišuć naviny. Jak heta źmianiaje pracu redakcyj
Były kiraŭnik adździełaŭ davieru ŭ Google i ByteDance Ardžun Narajan daŭ intervju Gizmodo, u jakim raskazaŭ pra składanaść ciapierašniaha histaryčnaha momantu, a taksama pra toje, jak navinavyja ahienctvy i redakcyi pavinny padychodzić da kantentu ŠI, kab jon moh zavajavać davier čytačoŭ, i čaho čakać ad ŠI ŭ blizkaj budučyni.
30.05.2023 / 11:14
Siońnia kampanii, redakcyi i palityki paśpiešliva sprabujuć raspracavać standarty, kab zachavać davier u śviecie, dzie infarmacyja, stvoranaja ŠI, budzie ŭsio čaściej źjaŭlacca ŭ internecie. Mnohija stvaralniki kantentu ŭžo vykarystoŭvajuć čat-botaŭ dla vypuskaŭ navin, niekatoryja ź jakich ŭtrymlivajuć patencyjna niebiaśpiečnuju chłuśniu.
Raptoŭnyja prablemy, ź jakimi siońnia sutykajucca hienieratary navin, jość vynikam pastupovaha naroščvańnia ałharytmaŭ rekamiendacyj i inšych praduktaŭ ŠI, jakija Ardžun Narajan dapamahaŭ kantralavać bolš za dvaccać hadoŭ — spačatku ŭ ByteDance i Google, a siońnia — u SmartNews, prykładańni dla pošuku navin, dastupnaha ŭ bolš čym 150 krainach.
Redakcyi pavinny raspracavać standarty
Siońnia składana vyznačyć, jakija historyi całkam napisanyja ŠI, a jakija nie. Hetaje adroźnieńnie ścirajecca. Adnak u tym, što ŠI stvaraje artykuły, niama ničoha drennaha, jak ličyć Ardžun Narajan. Praŭda, na jaho dumku, karystalnik pavinien viedać, što hety kantent byŭ napisany z dapamohaj čat-bota. Heta možna paznačać u podpisie abo ŭ samoj infarmacyi, što kantent byŭ častkova abo całkam zhienieravany ŠI.
U redakcyjach na hety kont jašče nie raspracavali nijakich standartaŭ.
Narajan taksama adznačaje, što redakcyjam patrebnyja kamandy faktčekinhu, jakija buduć karektavać usio, što vychodzić ź sistemy štučnaha intelektu, bo ŠI časta dapuskaje faktyčnyja niedakładnaści ci prydumlaje toje, čaho niama. Pa słovach Narajana, łohika pryniaćcia rašeńniaŭ ŠI pa-raniejšamu zastajecca «čornaj skryniaj». Niezrazumieła, kali jon napiša čarhovy fejk abo vydaść dezynfarmacyju.
Były kiraŭnik adździeła davieru ŭ Google taksama źviartaje ŭvahu, što kali čałaviek pierapracoŭvaje kantent, stvorany ŠI, to jon usio adno pavinien ličycca aŭtaram.
«Dumajcie pra heta jak pra kanviejer. Jość zboračnaja linija Toyota, dzie robaty źbirajuć aŭtamabili. Kali kančatkovy pradukt maje niaspraŭnuju padušku biaśpieki abo niaspraŭnaje rulavoje koła, Toyota pa-raniejšamu biare na siabie adkaznaść za heta, niezaležna ad taho, što hetuju padušku biaśpieki vyrabiŭ robat. Kali sprava dachodzić da kančatkovaha vyniku, adkaznaść lažyć na navinavym vydańni».
Ludzi patrebnyja i buduć patrebnyja
Jość vierahodnaść, što technałahičnyja kampanii, jakija chutka zvolnili ludziej praź imklivaje raźvićcio štučnaha intelektu, paśpiašalisia, vykazvaje mierkavańnie Ardžun Narajan. Asabliva ŭ śfierach HR, davieru i biaśpieki.
Što datyčyć miedyja, pa jaho słovach, tut jašče doŭhi čas budzie patrebnaja praca ludziej, jakija razumiejuć kantekst. Infarmacyju treba praviarać na dakładnaść, palityčny ŭchił, na adpaviednaść redakcyjnym standartam i kaštoŭnaściam. Heta moža rabić tolki čałaviek.
Vyklik dla palitykaŭ i hramadzianskaj supolnaści
Ardžun Narajan źviartaje ŭvahu, što hramadstva ciapier nie padrychtavanaje da pieramienaŭ, jakija adbyvajucca. Šmat ludziej stracili pracu, i jašče mnohija straciać, adnak orhany, jakija rehulujuć hetyja pracesy, nie byli hatovyja da takich chutkich skaračeńniaŭ i nie viedajuć, čym zaniać ludziej, jakija zastalisia biez pracy.
Na dumku Narajana, hramadzianskaj supolnaści taksama varta zadumacca nad hetymi pytańniami. Jana časta zdolnaja adreahavać navat chutčej, čym palityki.
«Ja nastrojeny aptymistyčna, ale dazvolcie mnie skazać vam voś što. U mianie jość siamihadovaja dačka, i ja časta pytajusia ŭ siabie, jakuju pracu jana budzie vykonvać. Praz 20 hadoŭ pracoŭnyja miescy, jakimi my ich viedajem siońnia, karennym čynam źmieniacca. My zachodzim na nieviadomuju terytoryju»,
— kaža były kiraŭnik adździeła davieru ŭ Google.
Jašče adna važnaja tema dla palitykaŭ — pradumać, u jakich siektarach ŠI varta vykarystoŭvać, a jakija śfiery pavinny zastacca dla jaho niedasiahalnyja.
Tak, naprykład, kaliści było pryniataje rašeńnie nie kłanavać čałaviečyja orhany — bo heta moža vyklikać masu etyčnych pytańniaŭ. Adnak ŠI možna było b prystasavać da taho, kab zajmacca daśledavańniem roznych užo doŭhi čas nievylečnych chvarob, takich jak chvaroby Parkinsana i Alchiejmiera, — i dapamahać čałaviečaj dumcy prasunucca ŭ hetym kirunku.
Dzie ŭ hetych pytańniach treba pravodzić miežy — heta, na dumku Narajana, taksama pytańnie dla ŭradaŭ.
Čytajcie jašče:
Ustań i idzi. Kampanija Iłana Maska pačnie vyprabavańni mazhavych impłantaŭ na ludziach
ES abaronić hramadzian ad štučnaha intelektu zakonam: nijakich «sacyjalnych rejtynhaŭ», raspaznavańnie tvaraŭ tolki pa rašeńni suda