Pucin padpisaŭ zakon, jaki dazvalaje pravodzić vybary na akupavanych terytoryjach i departavać ich žycharoŭ
U Rasii ŭnieśli źmieny ŭ zakon «Ab vajennym stanoviščy», jakija dazvalajuć, u pryvatnaści, pravodzić vybary na anieksavanych terytoryjach i departavać ich žycharoŭ. Adpaviedny zakon padpisaŭ prezident RF Uładzimir Pucin, piša «Mieduza».
29.05.2023 / 13:38
U Rasii ŭniesieny źmieny ŭ zakon «Ab vajennym stanoviščy», jakija dazvalajuć, u pryvatnaści, pravodzić vybary na anieksavanych terytoryjach i departavać ich žycharoŭ. Fota: AR
U zakonie «Ab vajennym stanoviščy» ciapier prapisali mahčymaść «prymusovaha pieramiaščeńnia hramadzian z terytoryi, dzie ŭviedzienaje vajennaje stanovišča, na terytoryi, na jakich vajennaje stanovišča nie ŭviedzienaje».
Taksama paśla ŭniesienych źmianieńniaŭ u zakon «Ab vajennym stanoviščy» źjaviłasia mahčymaść praviadzieńnia refierendumaŭ i vybaraŭ u orhany dziaržaŭnaj ułady i orhany miascovaha samakiravańnia. Rašeńnie ab ich pryniaŭ Centrvybarkam «pa vynikach kansultacyj ź fiederalnym orhanam vykanaŭčaj ułady».
Pravodzić vybary možna budzie jak na ŭsioj terytoryi, dzie ŭviedzienaje vajennaje stanovišča, tak i tolki na jaje častcy.
Novyja źmieny najpierš rehulujuć normy, źviazanyja z praviadzieńniem vybaraŭ u orhany dziaržaŭnaj ułady i ŭ orhany miascovaha samakiravańnia na akupavanych terytoryjach tak zvanych «DNR», «ŁNR», Zaparožskaj i Chiersonskaj abłaściej, jakija ŭ vieraśni hetaha hoda, na dumku rasijskich uładaŭ, prymuć udzieł u adzinym dni hałasavańnia.
Zakon praduhledžvaje mahčymaść stvareńnia vybarčych učastkaŭ za miežami hetych rehijonaŭ. Taksama ŭdakładniajecca, što hramadzianie padčas hałasavańnia zmohuć vykarystoŭvać nie tolki pašpart, ale i inšyja dakumienty, jakija jaho zamianiajuć.