Što moža aznačać pamiłavańnie Pratasieviča? Tłumačać analityki
Siońnia stała viadoma, što Raman Pratasievič, asudžany pa spravie Nexta na 8 hadoŭ kałonii ŭzmocnienaha režymu, byŭ pamiłavany. Spytali ŭ ekśpiertaŭ, čamu Łukašenka vyrašyŭ pajści na taki krok.
22.05.2023 / 17:48
Raman Pratasievič kala Minskaha abłasnoha suda, 22 maja 2023 h. Fota: BiełTA
Kłaskoŭski: «Mahčyma, Pratasieviča praciahnuć vykarystoŭvać u prapahandysckich metach»
Palityčny analityk prajekta «Pozirk» Alaksandr Kłaskoŭski miarkuje, što pamiłavańniem Pratasieviča ŭłady chočuć pakazać svoj nibyta humanizm.
«Dručki pa-raniejšamu aktyŭna vykarystoŭvajucca dla, tak by mović, stabilizacyi situacyi, ale treba niejak pieraciahvać častku hramadstva na svoj bok. Žest «miłasernaści» ŭ dačynieńni da Pratasieviča raźličany i na tych apanientaŭ režymu, jakija vahajucca. Nie ŭsim soładka ŭ palityčnaj emihracyi, tamu takim prykładam ułady chočuć niejkim čynam paŭpłyvać jak na nastroi pratesnaj častki hramadstva, tak i na tych, chto dumaje, što ŭ nas nie ŭsio tak drenna», — ličyć analityk.
Pry hetym Kłaskoŭski adznačaje, što efiekt ad takich dziejańniaŭ budzie niaznačny, bo represii praciahvajucca i sutnaść režymu nie źmianiajecca.
Hałoŭnym mesedžam, jaki ŭłady chacieli danieści, Kłaskoŭski ličyć pakajańnie.
«Ułady ŭ cełym i Łukašenka ŭ pryvatnaści aktyŭna piedalujuć temu pakajańnia. Jany akcentujuć uvahu na tym, što apanienty musiać prypaŭźci na kaleniach. Pratasievič zdaŭsia, uźniaŭ ruki. I navat siońnia kazaŭ, što šalona ŭdziačny krainie i prezidentu ŭ pryvatnaści.
Ale hetaja ŭmova — «prypaŭźci na kaleniach» — nieprymalnaja dla značnaj častki praciŭnikaŭ hetaj sistemy. Tamu ja dumaju, što vialikaha efiektu nie budzie», — kaža Kłaskoŭski.
Alaksandr Kłaskoŭski taksama nie vyklučaje, što praz kiejs z Pratasievičam ułady namahajucca pasprabavać ažyvić intares da kamisii pa viartańni, jakaja akazałasia nie vielmi zapatrabavanaj.
Raman Pratasievič. Skrynšot videa
«Mahčyma, jany raźličvajuć, što paśla hetaha ŭ ich źjavicca płyń zajaŭ, što małavierahodna, bo ŭsie razumiejuć, što heta takoje. Što pamiłavańnie možna atrymać tolki praz šlach poŭnaj maralnaj kapitulacyi, a heta dla mnohich nieprymalna».
Taksama Kłaskoŭski źviartaje ŭvahu, što toj ža Raman Pratasievič usio ž taki apynuŭsia ŭ Biełarusi nie pa svajoj voli.
«Kali b nie hetaja prymusovaja pasadka samalota, to Pratasievič moh by i dalej zastavacca apazicyjanieram, a taja kamisija prapanuje dobraachvotna viarnucca ŭ Biełaruś i zdacca režymu».
Siarod inšaha, Kłaskoŭski adznačaje, što pamiłavańnie Pratasieviča ŭ peŭnym sensie moža być elemientam hulni na ŭnutranym poli ŭ miežach padrychtoŭki da elektaralnaj kampanii 2024 hoda, kali adbudziecca «adziny dzień hałasavańnia».
Fota: «Naša Niva»
«Im patrebny niejkija hulcy na ŭnutranym poli. Mahčyma, Pratasieviča praciahnuć vykarystoŭvać u prapahandysckich metach. Mahčyma, jon chutka apyniecca niedzie pobač z Vaskrasienskim, kab pakazać, što idzie supraca ź nibyta pradstaŭnikami hramadzianskaj supolnaści, jakija stali na šlach vypraŭleńnia.
Miarkuju, što ŭładam takaja hulnia budzie patrebnaja, bo jany ŭžo razburyli treci siektar i zaraz źbirajucca začyścić palityčnyja partyi. Tamu im treba stvarać niejkuju butaforyju, kab na hetaj scenie niejkija fihury mahli rabić peŭnyja ruchi i zajavy», — ličyć analityk.
Pamiłavaŭšy Ramana Pratasieviča, režym pakazaŭ, što jon zdolny daravać, ale rabić heta jon moža vyklučna tady, kali całkam atrymaŭ pieramohu nad apanientam. Praz heta atrymlivajecca, što, naprykład, vyzvaleńnie Andreja Pačobuta ŭ abmien na adkryćcio «Babroŭnikaŭ» dla Łukašenki ŭjaŭlajecca nieprymalnym varyjantam.
«Heta było b dobra i ekanamična vyhadna dla krainy, ale tady Łukašenka nie vyhladaŭ by pieramožcam, jak u spravie z Pratasievičam, bo jamu nie ŭdałosia pastavić Pačobuta na kaleni. Tamu Łukašenka ličyć za lepšaje nieści niejkija ekanamičnyja straty, čym sastupić «vorahu».
Ale kali «vorah» pasypaŭ hałavu popiełam, to ŭłady mohuć pakazać hety falšyvy humanizm. A vyzvaleńnie Pačobuta dla Łukašenki vyhladaje, jak zdacca pierad Zachadam. Łukašenka baicca, što heta ŭzdymie bajavy duch praciŭnikaŭ, tamu viaźniam, jakija trymajucca ćviorda, jon daravać nie hatoŭ», — upeŭnieny analityk.
Šrajbman: «Kiejs z Pratasievičam — heta ŭnikalnaja historyja»
Arciom Šrajbman. Fota: staronka ŭ fejsbuku Arcioma Šrajbmana
Analityk Arciom Šrajbman ličyć, što pamiłavańnie Pratasieviča nielha ŭsprymać za pačatak niejkaha trendu. Jon upeŭnieny, što vypadak z Pratasievičam źjaŭlajecca adzinkavym i ŭnikalnym pa svajoj sutnaści.
«Kiejs z Pratasievičam — heta ŭnikalnaja historyja, kali davoli vidny palitviazień pajšoŭ na supracu, pryčym takoha vielmi vysokaha ŭzroŭniu. Jon nie prosta zapisaŭ adno pakajalnaje videa, a zdaŭ mnohich ludziej, aktyŭna vykarystoŭvaŭsia ŭ prapahandzie, vystupaŭ, vidavočna źmianiŭ niejkija svaje pohlady», — kaža Šrajbman.
Tamu, na dumku analityka, całkam łahična, što ŭłady chacieli b uznaharodžvać takija pavodziny.
«Uładam važna, kab ludzi, jakija ź imi supracoŭničajuć, nie dumali, što heta bieskarysna. Heta robicca na budučyniu. Kali Pratasieviča pasadzić na vosiem hadoŭ, to jakaja budzie matyvacyja ŭ inšych ludziej, u supracoŭnictvie ź jakimi zacikaŭlena ŭłada? Tamu całkam zrazumieła, što jany chacieli palehčyć jahony los», — ličyć Šrajbman.
Arciom adznačaje, što heta było bačna ad samaha pačatku, kali jon apynuŭsia pad chatnim aryštam, a paśla prysudu jaho nie nakiravali ŭ turmu.
«Adnak ja mierkavaŭ, što jon niekalki miesiacaŭ usio ž taki praviadzie ŭ turmie, ale akazałasia ŭsio bolš prazaična. Supracoŭničaŭ — voś tabie padziaka», — kaža Arciom Šrajbman.
Situtacyja ž z Pačobutam, za vyzvaleńnia jakoha polski bok abiacaŭ adnavić pracu «Babroŭnikaŭ», całkam inšaja.
«Pačobut pakazaŭ sabie mocnym čałaviekam, tamu pajści na sastupki pad ciskam z boku Zachadu za adkryćcio miažy dla Łukašenki aznačaje zhubić tvar. Jamu soramna rabić takoje. Jak kažuć, «pacany nie zrazumiejuć». Tolki palaki pryhrazili — i jon zdaŭsia, a Pačobut vyjdzie hierojem. A tut usio zrazumieła, bo Pratasievič całkam zdaŭsia na łasku vorahu i tut niama nijakich hierojaŭ, jak i niama nijakaha prynižeńnia dla Łukašenki».
Karbalevič: «Pakajciesia, pierajdzicie na naš bok, pachvalicie Łukašenku, abłajcie apazicyju»
Valer Karbalevič. Fota: «Naša Niva»
Palitołah Valer Karbalevič taksama źviartaje ŭvahu na toje, što ŭ vypadku z Pratasievičam ad samaha pačatku było vidavočna, što sprava idzie da hetaha.
«Tut i toje, što jon apynuŭsia pad chatnim aryštam, i toje, što padčas suda jon byŭ nie za kratami, a siadzieŭ u zale biez kajdankaŭ. I toje, što paśla vyniasieńnia prysudu jaho nie ŭziali pad vartu. Choć takoha ŭ Biełarusi pa takich ciažkich artykułach nie byvaje», — źviartaje ŭvahu palitołah.
Siarod inšaha Karbalevič adznačaje, što Raman nie padavaŭ apielacyi. Tamu, na jaho dumku, užo tady było zrazumieła, što razmova idzie pra niejkuju palityčnuju hulniu.
«Sens hetaj hulni pakazać usim, najpierš palitviaźniam i ŭvohule praciŭnikam Łukašenki, «pravilnuju» madel pavodzinaŭ. Palitviazień pavinien nie tolki pakajacca, pryznać svaje «pamyłki», supracoŭničać sa śledstvam, ale i kapitulavać palityčna i maralna. Taki čałaviek pavinien łajać apazicyju i pierajści na bok Łukašenki. Voś takuju madel prademanstravaŭ Pratasievič, za što ŭ vyniku atrymaŭ pamiłavańnie», — kaža Karbalevič.
Taksama Valer Karbalevič źviartaje ŭvahu na adzin z vystupaŭ Łukašenki, padčas jakoha toj prapanavaŭ apanientam pryznać, što jany paciarpieli parazu.
«U hetym i jość sens takoha pamiłavańnia — što tamu, chto pryznaje parazu i racyju režymu, ułady hatovy davać niejkija lhoty.
Heta musić tyčycca i tych, chto emihravaŭ. Dla hetaha i stvorana admysłovaja kamisija pad kiraŭnictvam Švieda. Pakajciesia, pierajdzicie na naš bok, pachvalicie Łukašenku, abłajcie apazicyju, raskažycie, jak vas vykarystali, — i budzie vam ščaście», — kaža Karbalevič.
Pry hetym palitołah nie ličyć, što taki praces budzie masavy. Pieršym, kaho pamiłavaŭ Łukašenka, byŭ Jury Vaskrasienski.
Jury Vaskrasienski. Fota: «Naša Niva»
«Na tysiačy ludziej heta vielmi mała, što pakazvaje na toje, što biełaruskaja demakratyčnaja supolnaść nie idzie na takija kroki i nie choča iści na maralnuju kapitulacyju», — kaža Valer Karbalevič.
Valer Karbalevič taksama miarkuje, što ciapier ułady prosta nie hatovyja da niejkich dziejańniaŭ, nakiravanych na palapšeńnie adnosin z Zachadam.
«Kali ŭ 2015 hodzie paŭstała pytańnie narmalizacyi adnosin z Zachadam, to Kazulina, Statkieviča prosta vypichnuli za dźviery kałonii. Tamu ciapier vyhladaje, što ŭłady nie hatovyja iści na niejkija sastupki, kab pačać prosta tak daravać svaim apanientam», — ličyć Karbalevič.
«Šalona ŭdziačny krainie i asabista prezidentu». Raman Pratasievič pamiłavany
«Naša dziaŭčynka ŭsio heta ciahnie, a hety…» Ciotka Safii Sapiehi prakamientavała pamiłavańnie Pratasieviča