Da MKAD — 0 mietraŭ. Što pradajecca ŭ adzinym dačnym pasiołku ŭ miežach Minska
Dačy niepasredna ŭnutry Minska? Tak, jość u nas i takoje sadovaje tavarystva. ST «Dražnia» raźmieščanaje prama ŭ miežach horada, ale pry hetym ź niekalkich bakoŭ akružanaje lesam. Na hetuju ziamlu nie raz rabili «zamach», adnak dačy praciahvajuć zastavacca na svaim miescy. Realt pahladzieŭ, pačym tam pradajucca ŭčastki i damy.
21.05.2023 / 12:09
Siońnia ST «Dražnia» chavajecca ŭ hłybini adnajmiennaha pramysłovaha mikrarajona. Pad voknami ŭ staličnych dačnikaŭ — les, pobač — pryvatny siektar i šmatpaviarchoviki na Anharskaj, navoddal — zavody i CEC.
Naohuł, dača ŭ horadzie — heta ŭnikalny vypadak. Dabracca da svaich učastkaŭ haspadary mohuć na zvyčajnym haradskim transparcie. Tolki što mietro siudy jašče nie dachodzić.
Pieršyja dačy pobač ź lasnym masivam źjavilisia ŭ 50-ch hadach minułaha stahodździa. Učastki tut vydzialali rabotnikam Minskaha traktarnaha zavoda. Tady heta była viaskovaja ŭskraina Minska. Mikrarajon «Dražnia» ŭklučyli ŭ skład horada krychu paźniej.
Ciapier u pasiołku kala 400 dač. Niahledziačy na blizkaść cyvilizacyi, bolšaść dačnikaŭ karystajucca svaimi chatkami tradycyjna tolki ŭ siezon. Ceły hod u ST žyvuć kala 50 siemjaŭ.
Što tut pradajecca?
Voś hety ŭčastak z raznastajnymi pabudovami — na siońniašni dzień samaja ekanamičnaja prapanova ŭ pasiołku. Na 7 sotkach znachodzicca staraja ščytavaja chatka pad znos i śviežy niedabudavany abjekt.
Košt - 30 tysiač dalaraŭ.
Nastupny dom, vystaŭleny na prodaž, byŭ pabudavany ŭ 1980 hodzie i rekanstrujavany ŭ 2020-m. Na ŭčastku ŭ 8 sotak znachodziacca: dom z mansardnym paviercham, haspadarčyja budynki, sklep, ciaplica. Novych uładalnikaŭ paradujuć darosłyja pładanosnyja drevy (jabłyni, čarešnia, abrykosy, hrušy, ślivy, višnia) i kusty (ahrest, maliny, bružmiel, ažyny, parečki, ajva).
U draŭlanaj chacie płoščaj 118 kvadratnych mietraŭ jość dva kaminy, paŭnavartasny sanvuzieł, bojler.
Košt — 51,5 tysiačy dalaraŭ.
Hetaja dača taksama hatovaja dla pražyvańnia kruhły hod. Dvuchpaviarchovy katedž byŭ uźviedzieny ŭ 2007 hodzie i maje płošču ŭ 135 «kvadrataŭ». U domie, vybudavanym z błokaŭ, jość usie vyhody — jon abstalavany pieletnym katłom polskaj vytvorčaści, na ŭčastku zroblenaja śvidravina, jość miascovaja kanalizacyja.
Płošča ŭčastka składaje 8 sotak. Tut rastuć jabłyni i ažyna, jość padmurak pad łaźniu.
Košt dačy — 80 tysiač dołaraŭ.
Nu i narešcie — samy stylny dom u ST «Dražnia». Jon byŭ pabudavany ŭ 2001 hodzie i rekanstrujavany ŭ 2008-m.
Płošča draŭlanaj pabudovy — 160 kvadratnych mietraŭ jość taksama krytaja letniaja vieranda płoščaj 22 «kvadraty».
U domie ŭstanoŭlenaja elektryčnaja sistema aciapleńnia, padłohi z padahrevam, jość miascovaja kanalizacyja, svaja śvidravina i bojler. Nu, a dla niezabyŭnaj atmaśfiery ŭ chałodnyja zimovyja viečary možna vykarystoŭvać pieč.
Učastak u 8 sotak abharodžany mietaličnym štykietnikam z adkatnymi varotami na pulcie kiravańnia. Na ŭčastku jość ciaplica z polikarbanatu.
Pobač — les, łyžarolernaja trasa, prypynak, kramy «Jeŭraopt», «Śviatłafor», «Susiedzi». Da mietro «Mahiloŭskaja» na hramadskim transparcie — 10 chvilin.
Košt — 130 tysiač dalaraŭ.