Трыбунал для Лукашэнкі і дапамогу беларускім вымушаным эмігрантам абмяркоўвала Ціханоўская ў Рэйк’явіку
Лідарка дэмакратычных сіл Святлана Ціханоўская бярэ ўдзел у саміце Рады Еўропы, які праходзіць у Рэйк’явіку. Там прысутнічаюць кіраўнікі 46 краін.
17.05.2023 / 10:12
Святлана Ціханоўская сустрэлася з прэзідэнтам Парламенцкай Асамблеі Рады Еўропы Ціні Коксам. Фота: Офіс Ціханоўскай
Святлана Ціханоўская ўчора сустрэлася з прэзідэнтам Парламенцкай Асамблеі Рады Еўропы Ціні Коксам. Ён запрасіў Ціханоўскую выступіць на пленарнай сесіі ПАРЕ ў чэрвені, дзе будзе агучаны даклад па сітуацыі з беларускімі ўцекачамі, паведамляе Офіс Ціханоўскай. Даклад рыхтаваўся люксембургскім прадстаўніком ПАРЕ з удзелам дэмакратычных сіл Беларусі.
У дакуменце гаворыцца, што ад 200 тысяч да 500 тысяч чалавек выехалі з Беларусі пасля 2020 года і падвяргаюцца рознага кшталту абмежаванням.
У дакладзе даюцца практычныя рэкамендацыі, якім чынам дапамагчы беларусам, што апынуліся ў вымушанай эміграцыі. Яго прэзентацыя павінна змяніць стаўленне да беларусаў у выгнанні з боку замежных краін, спадзяюцца ў штабе Ціханоўскай.
Таксама Святлана Ціханоўская і Ціні Кокс абмеркавалі сітуацыю з масавым прымусовым вывазам украінскіх дзяцей з акупаваных тэрыторый не толькі ў Расію, але і ў Беларусь, датычнасць да гэтага Лукашэнкі. Дамовіліся, каб гэтае пытанне было ўзнята на найбліжэйшых сустрэчах на сесіях ПАРЕ і было ўключана ў даклад па Украіне. Гэта дазволіць прыцягнуць рэжым Лукашэнкі да адказнасці ў міжнародных судах, мяркуюць у штабе.
Механізмы стварэння трыбунала таксама былі тэмаю абмеркавання. Лукашэнка з яго паплечнікамі могуць панесці адказнасць за парушэнні правоў чалавека, злачынствы супраць чалавечнасці, за саўдзел у вайне, паведамляе штаб Ціханоўскай.
Разам з прэзідэнтам ПАРЕ Ціханоўская абмеркавала таксама крокі, якія трэба рабіць для ўступлення Беларусі ў Раду Еўропы.
«Супраца з ПАРЕ, з Радай Еўропы мае вельмі важнае значэнне для Беларусі, — сказала Ціханоўская. — Бо гэта ў тым ліку дазваляе змяншаць залежнасць Беларусі ад Расіі, дае дэмакратычнай Беларусі суверэнітэт і такім чынам абараняе краіну ад паглынання Расіяй. Вельмі важна, каб Рада Еўропы займала праактыўную пазіцыю да беларусаў».
Была дасягнутая дамова аб тым, што прадстаўнікі беларускай грамадзянскай супольнасці, партый будуць удзельнічаць у пасяджэннях ПАРЕ з правам назіральнікаў. Задача — каб як мага больш розных палітычных сіл мела магчымасць прадставіць беларускую пазіцыю ў Радзе Еўропы, каб там гучаў голас беларусаў, а не рэжыму, адзначаюць у штабе Ціханоўскай.