Ułady vyznačylisia ź ideałahičnym manumientam na Kastryčnickaj płoščy ŭ Minsku. Voś jak jon budzie vyhladać
Ministr kultury Anatol Markievič na pasiadžeńni Respublikanskaha savieta pa histaryčnaj palitycy raskazaŭ, što nad skulpturnaj kampazicyjaj ciapier pracuje aŭtarski kalektyŭ pad kiraŭnictvam Kanstancina Kaściučenki.
16.05.2023 / 17:36
Makiet pomnika. Fota: «Źviazda»
Respublikanski saviet pa histaryčnaj palitycy byŭ stvorany rasparadžeńniem Alaksandra Łukašenki 4 lutaha 2022 hoda — mienavita hety hod aficyjnyja ŭłady abviaścili «Hodam histaryčnaj pamiaci».
Raniej na Kastryčnickaj płoščy isnavaŭ pomnik Iosifu Stalinu, pastaŭleny ŭ 1952 hodzie. Pomnik byŭ źniesieny za adnu noč 3 listapada 1961 hoda, paśla raźviančańnia kultu asoby savieckaha pravadyra.
Prezientacyja prajekta ŭ listapadzie 2022 hoda. Źleva skulptura sialanki sa ściahami i dziciem, pobač makiet Kastryčnickaj płoščy z pomnikam, dalej — pavialičany frahmient makieta, z raźmieščanymi pa kole skulpturnymi vyjavami abłaściej. Fota: telehram-kanał Ministerstva kultury Biełarusi.
Manumient, piša BiełTA, budzie pryśviečany tak zvanamu «adzinstvu biełaruskaha naroda». U centry kampazicyi płanujuć raźmiaścić fihuru, jakaja ŭvasablaje Biełaruś, sa ściaham u adnoj u ruce i dziciem — u druhoj. Bareljefy na pastamiencie buduć apaviadać pra roznyja pieryjady biełaruskaj historyi. Vakoł centralnaj fihury buduć raźmieščanyja simvaličnyja vyjavy abłaściej.
Naprošvajecca paralel sa znakamitym fantanam «Družba narodaŭ» na VDNH u Maskvie, dzie pa kole vystaŭlenyja 16 skulptur dziaŭčat u nacyjanalnych kaściumach, z roznaj sadavinoj i halinami ŭ rukach, jakija pavinny byli simvalizavać sajuznyja respubliki.
Fantan «Družba narodaŭ» na VDNH u Maskvie. Fota: Wikimedia Commons
Jak adznačajecca, prajekt i nazva centralnaj fihury jašče prapracoŭvajucca.
Skulptar Kanstancin Kaściučenka viadomy ŭ pieršuju čarhu kampazicyjaj «Brama pamiaci» ŭ niadaŭna stvoranym miemaryjalnym kompleksie «Traścianiec». Za hety prajekt tvorčamu kalektyvu była prysudžanaja Dziaržaŭnaja premija ŭ halinie litaratury, mastactva i architektury za 2020 hod.
«Brama pamiaci» ŭ Traściancy, stvoranaja skulptaram Kanstancinam Kaściučenkam. Fota: Wikimedia Commons
Eskiznyja prajekty pamiatnaha znaka na Kastryčnickaj płoščy vynosilisia na razhlad mižviedamasnaj pracoŭnaj hrupy pa pytańni stvareńnia tvoraŭ manumientalnaha mastactva patryjatyčnaj skiravanaści 1 listapada 2022 hoda. Tady praŭładnyja ekśpierty vykazali mierkavańnie ab rabotach i dali rekamiendacyi.
Razhlad eskiznych prajektaŭ u listapadzie 2022 hoda. Fota: telehram-kanał Ministerstva kultury Biełarusi
Ministr Markievič adznačaŭ:
«Bačnaja kałasalnaja praca, vaša enierhietyka ŭ hetych eskizach, vaša bačańnie. Samaje hałoŭnaje, što hetaje bačańnie pazityŭnaje i žyćcieśćviardžalnaje, adlustroŭvaje našu vialikuju historyju i padkreślivaje sučasnaje žyćcio».
Čytajcie taksama:
Novy znak na hary Dziaržynskaj maje dźvie pamyłki ŭ piaci słovach
Anatol Jarmolenka praśpiavaŭ z rasijskim prapahandystam pieśniu biełaruskaha nacyjanalista VIDEA
U Biełarusi źbirajucca vydać «zbornik vieršaŭ miascovych paetaŭ» ź litaraj Z na vokładcy