Rasija admianiła vizavy režym z Hruzijaj i adnaviła avijaznosiny. Prezident Hruzii nazvała heta pravakacyjaj
Rasija admianiła vizavy režym z Hruzijaj z 15 maja i źniała zabaronu na paloty tudy rasijskich avijakampanij. Prezident Hruzii Sałame Zurabišvili nazvała heta «čarhovaj pravakacyjaj» praz vajnu Rasii suprać Ukrainy.
10.05.2023 / 14:33
Rasija z 15 maja admianiaje vizavy režym z Hruzijaj. Taki ŭkaz padpisaŭ prezident Rasii Uładzimir Pucin. Pra heta stała viadoma siońnia. Z 15 maja hramadzianie Hruzii zmohuć ujazdžać u Rasiju biez afarmleńnia viz na padstavie dakumientaŭ, jakija paćviardžajuć ich asobu. Vyklučeńnie — hramadzianie Hruzii, jakija jeduć u RF pracavać albo płanujuć zastavacca ŭ krainie bolš za 90 dzion dla časovaha znachodžańnia, u tym liku ŭ metach atrymańnia adukacyi.
Akramia taho, Pucin źniaŭ zabaronu na paloty rasijskich avijakampanij u Hruziju, jakaja dziejničała z červienia 2019 hoda. Mintrans RF zajaviŭ, što rychtujecca adnavić paloty ŭ Hruziju.
Taksama MZS Rasii admianiła rekamiendacyju rasijanam ustrymlivacca ad pajezdak u Hruziju.
Prezident Hruzii Sałame Zurabišvili nazvała skasavańnie Rasijaj vizavaha režymu dla hramadzian jaje krainy «čarhovaj pravakacyjaj».
«Adnaŭleńnie pramych avijaznosin i admiena vizavaha režymu z Hruzijaj nieprymalnyja, pakul Rasija praciahvaje ahresiju suprać Ukrainy i akupuje našu terytoryju!» — zajaviła jana ŭ tvitary.
Ułady Hruzii nie davali svajoj zhody i na adnaŭleńnie avijaznosin.