«Kropli Boha»: chto b moh padumać, što sieryjał pra dehustacyju vina moža być zachaplalnym
Šou pieratvaraje nišavuju kulturu vinnaj ekśpiertyzy ŭ dramu z bujnymi staŭkami — navat prosty praces niuchańnia šklanki ŭ sieryjale vyhladaje napružanym. U dadatak da hetaha — składanyja siamiejnyja historyi, šnary dziacinstva i ŭzajemadziejańnie dźviuch kultur — japonskaj i francuzskaj.
10.05.2023 / 18:33
Isej (Tamachisa Jamasita) i Kamiła (Flor Žefryje) spaborničajuć za prava atrymać u spadčynu vinny sklep z 87 tysiačami butelek koštam amal 150 miljonaŭ dalaraŭ. Fota: Apple TV+
Sieryjał Drops of God, premjera jakoha adbyłasia 21 krasavika na Apple TV+, raspaviadaje historyju siamji i kankurencyi ŭ śviecie vinnych ekśpiertaŭ.
Lehiendarny vinarob Alaksandr Leže pamiraje i pakidaje svoj majontak dy spadčynu tamu, chto pieramoža ŭ «vinnym» spabornictvie. Kamiła Leže (Fler Žefryje) — dačka, jakaja ŭžo daŭno nie padtrymlivaje znosin z baćkam, nieachvotna nakiroŭvajecca ŭ Tokia, kab jaho ŭbačyć. Kali jana sustrakajecca ź jaho advakatam, kab abmierkavać zaviaščańnie, da jaje niečakana dałučajecca jašče adzin čałaviek — Isej Tomin (Tamachisa Jamasita), prateže Alaksandra na praciahu mnohich hadoŭ.
Isej razryvajecca pamiž svajoj apantanaściu enałohijaj i čakańniami svajoj bahataj siamji, jakaja choča, kab jon dałučyŭsia da ich ałmaznaj pramysłovaści, i asudžaje zachapleńnie syna vinom. Kamiła ž dystancyjavałasia ad vinarobstva i spadčyny svajho baćki da takoj stupieni, što ŭ jaje kroŭ z nosa idzie, jak tolki jana kaštuje ałkahol. Psichasamatyčny pryliŭ kryvi — pierakanaŭčaja prykmieta taho, što žančyna zadušyła bolšuju častku svajoj traŭmy i kryŭdy na baćku-niabožčyka.
Takim čynam, francužanka i japoniec akazvajucca ŭciahnutymi ŭ svajho rodu zaciažnuju duel z roznymi vyprabavańniami na praciahu niekalkich miesiacaŭ.
Tam, dzie Isej analityčny i erudyjavany, bolš emacyjnaja Kamiła amal ničoha nie viedaje pra vino. Ale zatoje jana naradziłasia z takim vydatnym pačućciem smaku, što padčas konkursu jaje nazyvajuć «Mocartam vina».
U asnovie — japonskaja manha
Sieryjał zasnavany na adnajmiennaj japonskaj manzie 2004 hoda. Drops of God napisali brat i siastra Juka i Sin Kibajasi, jakija aboje vinnyja entuzijasty i pišuć pad psieŭdanimam Tadasi Ahi. Ich manha atrymała vysokuju acenku za realistyčny pakaz śvietu dehustacyi elitnych vinaŭ, što zrabiła hetuju śfieru «nie dla ŭsich» bolš dastupnaj dla aŭdytoryi.
Choć aryhinalny komiks składaŭsia z 44 tamoŭ, u sieryjale ad Apple TV — usiaho vosiem epizodaŭ. Što jašče bolš važna, sieryjał mianiaje hierojaŭ-japoncaŭ na francuzaŭ.
Kiejt Sančes, hałoŭnaja redaktarka časopisa But Why Tho? i ekśpiertka kino, piša, što dla jaje hetaja sproba «pryciahnuć Jeŭropu» stała vialikim siurpryzam, a Džon Paŭer u recenzii dla NPR adznačaje, što «Kropli Boha» atrymalisia amal poŭnaj supraćlehłaściu aryhinalnaj manzie, jakaja napisanaja «biestałkova i svabodna», tady jak sieryjał vyhladaje jak hlancavaja, darahaja i pyšnaja drama, dzie piersanažy padadzienyja z peŭnaj dolaj kulturnych kliše.
U toj ža čas toje, jak stvaralniki šou źmianili historyju, dazvalaje joj stać čymści novym, i tyja hledačy, chto nie znajomy z aryhinalnaj manhaj, usprymuć historyju całkam naturalna, z zadavalnieńniem nazirajučy za pieramiaščeńniami hierojaŭ z soniečnych vinahradnikaŭ Francyi ŭ prachałodnyja šeryja biznes-rajony Tokia.
Tamachisa Jamasita i Fler Žefryje ŭ sieryjale Drops of God. Fota: Apple TV+
Temy
«Kropli Boha» daśledujuć siamju — toje, jak jana pryhniataje abo vyzvalaje — na prykładzie adčužeńnia Kamiły ad baćki abo niepryniaćcia Iseja jaho svajakami.
Akramia hetaha, sieryjał adkryvaje pierad hledačami zasłonu zamknionaha koła ekśpiertaŭ pa vinie i zahłyblaje ŭ roznyja tonkaści hetaj spravy.
Pryčym jość elemienty, jakija robiać dehustacyju bolš, čym prosta dehustacyjaj — tak, źviazvajučy smaki i pachi z momantami času, Kamiła raskryvaje pierad hledačami svajo minułaje. Kali hierainia sprabuje vyznačyć vino ci smak, jana nakiroŭvajecca ŭ prastoru svaich uspaminaŭ, napoŭnienuju ŭsim, čamu jaje navučyŭ baćka — tak vinnaja sprava stanovicca temaj, praź jakuju raskryvajucca čałaviečyja ŭzajemaadnosiny i dačynieńni.
Styl
U ahladzie dla MobieWeb Mećju Maler adnosić «Kropli Boha» da tak zvanych chałodnych filmaŭ — stužak, u jakich niama vialikaj kolkaści kakafaničnych kanfliktaŭ i biaskoncaha napružańnia, jakija nie prymusiać śmiajacca abo płakać, a vyklikajuć tolki spakojnuju ŭśmiešku. Tak, jość dramatyčnyja prablemy i kanflikty, ź jakimi sutykajucca piersanažy, ale jany čałaviečnyja, a nie pierabolšanyja, i razyhryvajucca miakka i tonka. Siarod hierojaŭ jość svajho rodu «złydni» (maci i dziadula Iseja), ale navat jany razhladajucca praz pryzmu spahady i kulturnaj śpiecyfiki.
«Hety idealny film dla vychadnych achinie vas suciašalnaj, cikavaj historyjaj pra siamju, kulturu i vino», — reziumuje ahladalnik.
Rejtynh sieryjała na Rotten Tomatoes: 100% ad krytykaŭ na padstavie dzieviaci recenzij i 98% ad hledačoŭ na padstavie bolš jak piacidziesiaci vodhukaŭ.
Vam taksama moža spadabacca: