Adbylisia zatrymańni i sudy nad supracoŭnikami homielskaha radyjo
Pravaabaroncam paviedamili, što ŭčora, 5 maja, na pracoŭnym miescy zatrymali redaktara homielskaha radyjo i žurnalista Siarhieja Krasnabaroda i jašče troch supracoŭnikaŭ radyjo — radyjoviadučych Žannu Mininu i Nastaśsiu Hrycenka, hukarežysiora Arcioma Vasilkova.
06.05.2023 / 13:36
Siarhiej Krasnabarod. Fota: Onliner
Učora ŭ sudzie Centralnaha rajona Homiela ŭsich čatyroch zatrymanych sudzili pavodle č. 2 art. 19.11 KaAP (raspaŭsiud ekstremisckich materyjałaŭ). Spravy razhladali sudździ Siarhiej Sakałoŭski, Viktar Kazačok, Siarhiej Karmanovič, Alesia Osipava.
Pravaabaroncam viadomy tolki vyrak suda Siarhieju Krasnabarodu — 15 sutak aryštu za padpisku na «ekstremiscki» telehram-kanał. Jon znachodzicca ŭ miascovym IČU. Los inšych zatrymanych pakul nieviadomy.
Profili supracoŭnikaŭ užo vydalenyja z sajta dziaržaŭnaha radyjo.
Vydańnie «Fłahštok» źviartaje ŭvahu, što siarod zatrymanych žurnalistka Žanna Minina. Jana nieadnojčy brałasia za prapahandysckija materyjały, u jakich zmahałasia ź niezaležnymi ŚMI i nazyvała rezanansnyja naviny fejkami.
Jašče ŭ pačatku 2022 hoda žančyna pracavała na małabiudžetnym kanale Homielskaha harvykankama. Ale ŭ tym ža hodzie pajšła na pavyšeńnie — jana stała viadoŭcaj na rehijanalnym homielskim kanale «Biełaruś 4».
Što tyčycca inšych zatrymanych, to jany nie byli zaŭvažanyja ŭ prapahandysckaj dziejnaści.