Клінтан: З 2011 года было ясна, што вайна Расіі супраць Украіны — толькі пытанне часу
Былы прэзідэнт ЗША Біл Клінтан падзяліўся сваімі ўспамінамі пра сустрэчу з Уладзімірам Пуціным у швейцарскім Давосе ў 2011 годзе. Са слоў Клінтана, пасля гутаркі з расійскім прэзідэнтам яму ўжо тады стала зразумела, што расійская атака на Украіну — толькі пытанне часу, піша Бі-бі-сі.
05.05.2023 / 11:53
Біл Клінтан. Фота: AP
Ён успамінае, што Пуцін у звычайнай размове казаў рэчы, якія ледзянілі душу.
У прыватнасці, Пуцін даў зразумець, што не збіраецца прытрымлівацца дамовы, заключанай яго папярэднікам Барысам Ельцыным пры пасрэдніцтве ЗША, згодна з якой Расія абавязалася паважаць тэрытарыяльны суверэнітэт Украіны ў абмен на адмову Кіева ад свайго ядзернага арсенала савецкіх часоў.
«Уладзімір Пуцін сказаў мне ў 2011 годзе — за тры гады да таго, як ён захапіў Крым, — што ён не згодны з пагадненнем, якое я заключыў з Барысам Ельцыным. Ён сказаў: «Я не згодны з гэтым, я гэта не падтрымліваю і не лічу сябе звязаным гэтай дамовай». І з таго дня я ведаў, што гэта [вайна супраць Украіны] — толькі пытанне часу», — успамінае Біл Клінтан.
Хілары Клінтан сказала, што канец прэтэнзіям Расіі да Украіны пакладзе толькі поўная перамога Украіны ў гэтай вайне.
«Я б не стала давяраць яму [Пуціну] за сталом перамоваў ні пры якіх абставінах, калі толькі ва ўкраінцаў, якіх мы падтрымліваем, не будзе дастаткова рычагоў уздзеяння», — сказала Хілары Клінтан.
Пад рычагамі ўздзеяння яна мае на ўвазе вернутыя ўкраінскія тэрыторыі на ўсходзе Украіны, часова акупаваныя Расіяй.
Чытайце таксама:
Клінтан выказаў шкадаванне, што схіліў Кіеў да адмовы ад ядзернай зброі