«Мы выглядаем як клоўны». Прыгожын адказаў, ці трэба ўжыць ядзерную зброю з-за беспілотнікаў над Крамлём
Кіраўніка ПВК «Вагнер» Яўгена Прыгожына папрасілі пракаментаваць прапановы ў сеціве адказаць на дроны над Крамлём ядзернай зброяй.
04.05.2023 / 13:35
«Як вы лічыце, ці апраўдана гэта? Якія меры ў адказ, па-вашаму, павінны быць прынятыя?» — спыталі ў Прыгожына.
Прэс-служба Прыгожына апублікавала яго адказ.
«Як чалавек радыкальна настроены, я магу сказаць, што пра ўжыванне ядзернай зброі ў адказ на беспілотнік, вядома, ніякай гаворкі быць не можа.
Трэба перш за ўсё на дыбу таго, хто адказвае за барацьбу з беспілотнікамі, разабрацца, як гэта магло адбыцца ў прынцыпе, а пасля гэтага прыкласці ўсе намаганні для таго, каб мы сталі вядучай дзяржавай у галіне развіцця тэхналогій БПЛА, і такімі ж беспілотнікамі адказваць.
А так, мы выглядаем як клоўны, якія пагражаюць «ядранай бомбай» на дзіцячы беспілотнік», — адрэагаваў Прыгожын.
Ноччу 3 мая, паводле расійскага боку, украінцы атакавалі Крэмль двума беспілотнікамі.
У выніку падзення і разлёту аскепкаў ніхто не пацярпеў.
Крэмль назваў атаку тэрактам і замахам на Пуціна. Украінскі бок адмаўляе сваю датычнасць да здарэння.