Лукашэнка прапанаваў Ізраілю аднавіць авіязлучэнне
Аляксандр Лукашэнка павіншаваў прэзідэнта Ізраіля Іцхака Герцага з 75-годдзем незалежнасці гэтай дзяржавы.
26.04.2023 / 08:37
Аэрапорт Бен-Гурыёна ў Тэль-Авіве
У віншаванні ён згадаў ураджэнцаў Беларусі, якія спрычыніліся да вытокаў ізраільскай дзяржаўнасці: Хаіма Вейцмана, Менахема Бегіна, Залмана Шазара, Іцхака Шаміра, Шымона Перэса.
Таксама Лукашэнка заявіў, што Беларусь зацікаўлена ў плённых двухбаковых адносінах і супрацоўніцтве: «Упэўнены, што далейшае ўмацаванне двухбаковых сувязяў адпавядае агульным інтарэсам нашых краін, таму сёння неабходна аднавіць рэгулярнае авіязлучэнне паміж Беларуссю і Ізраілем, якое з'яўляецца важным фактарам павышэння эфектыўнасці гандлёва-эканамічнага ўзаемадзеяння, захавання міжасобасных кантактаў і культурных абменаў».
«Белавія» не лятае ў Ізраіль з канца мая 2022 года. Тады аэрапорт «Бэн-Гурыён» адмовіў кампаніі ў абслугоўванні рэйсаў.