«Moža, sami pabudźcie śviatymi?» Ksiondz Łašuk adkazaŭ na rasśledavańnie pra jaho suviazi z «kašalkom» Łukašenkaŭ, a paśla vydaliŭ post
Staŭbcoŭski ksiondz Ihar Łašuk, pra ciesnyja finansavyja suviazi jakoha z «kašalkom» siamji Łukašenkaŭ Alaksandram Zajcavym stała viadoma z rasśledavańnia Biełaruskaha rasśledavalnickaha centra, nie staŭ maŭčać i rezka adreahavaŭ na krytyku jahonych dziejańniaŭ.
23.04.2023 / 16:03
Ajciec Ihar Łašuk. Fota sa staronki staŭpieckaj parafii Śviatoha Kazimira ŭ fejsbuku
Pavodle Biełaruskaha rasśledavalnickaha centra, u vieraśni 2021 hoda śviatar Ihar Łašuk zasnavaŭ kampaniju «Alis ma», na jakuju padsankcyjnyja ŭładalniki kampanii «Bremina hrup», što naležyć Alaksandru Zajcavu, pierapisali častku svajoj majomaści. I heta prytym, što zajmacca biznesam katalickim śviataram zabaraniaje navat kananičnaje prava.
Reakcyja na dziejańni ksiandza Łašuka ŭ sacsietkach była zbolšaha krytyčnaja, prytym abureńnie vyklikała nie stolki samo supracoŭnictva śviatara z praŭładnym biznesmienam, kolki stupień zaanhažavanaści ŭ supracoŭnictva. Choć byli i sproby pastavicca da jaho dziejańniaŭ z razumieńniem. Jak napisaŭ adzin z udzielnikaŭ dyskusii,
«my nie majem maralnaha prava krytykavać tych, chto zastaŭsia va akupacyi, chto niešta robić i vymušany tam žyć. Nam, žyvučy ŭ Varšavach i Vilniach, vielmi prosta ckavać biełarusaŭ za vymušanaje supracoŭnictva z režymam. Ale ž miljony biełarusaŭ vymušanyja tak žyć… Lepš napaści na ksiandza, jaki ŭ zaležnaści, jak i tyja, chto vymušana žyvie pry hetym režymie».
Na padobnyja zaŭvahi, adnak, išli piarečańni takoha ahulnaha charaktaru, što ŭsio zaležyć ad stupieni zaanhažavanaści ŭ supracoŭnictva, taja ž stupień, pra jakuju stała viadoma z rasśledavańnia BRC, jaŭna pieraŭzychodzić patreby zvyčajnaha vyžyvańnia i pieratryvańnia.
U adnym z takich abmierkavańniaŭ da dyskusii dałučyŭsia sam Ihar Łašuk, jaki napisaŭ nastupnuju repliku:
«Moža, sami pabudźcie śviatymi i, kab pabudavać kaścioł, znajdzicie chady va ŭładzie, jakija navat ziamli nie dajuć, chady ŭ ijerarchii kaściolnaj, jakija ničym nie dapamohuć i nie mohuć, a taksama hrošy: narod biedny, a kaścioł mieć choča. Zahranica, jakaja nie dapamahaje, bo na pieršym miescy ci to Afryka, a ciapier Ukraina».
Takim čynam Ihar Łašuk, jaki za hady śviatarstva zajmieŭ słavu «ksiandza-budaŭnika», faktyčna zaśviedčyŭ, što hałoŭnaj matyvacyjaj, jakaja schiliła jaho da takoha ščylnaha zaanhažavańnia ŭ supracoŭnictva z praŭładnym biznesmienam, stała žadańnie biez prablem skončyć uźviadzieńnie budynka kaścioła, usie ž inšyja mierkavańni na hetym fonie vystupajuć jak druhasnyja.
U toj ža čas na staroncy svajho kaścioła ŭ fejsbuku ksiondz Łašuk zapačatkavaŭ dyskusiju pa hetym pytańni, daŭšy ŭvodny pravakacyjny post:
«Sabaki brešuć, a karavan idzie. Ludziam nie dahodziš i nie dakažaš, usio adno na kryž paviesiać, ci tyja, ci hetyja».
Prychilniki takoj pazicyi ksiandza byli, ale byli i krytyki. Krytyka viałasia pieradusim pa linii abmierkavańnia taho, što dla śviatara musić być važniejšaje — budynki ci dušy. Replika žurnalista i katalickaha aktyvista Maksima Hacaka była nie mienš rezkaj, čym sam post:
«Prykolna vy viernikaŭ nazyvajecie sabakami. Upeŭnieny, što vašyja pavodziny i zajavy dakładna ŭmacujuć aŭtarytet Kaścioła ŭ Biełarusi (spojler — nie). Kaścioły, kaniečnie, buduć stajać pustymi, ale ž pabudavanymi za hrošy, z dapamohaj jakich bjuć biełarusaŭ i pahražajuć ukraincam. Pośpiechaŭ vam i vašamu siabru-rycaru, jaki nazyvaŭ Kaścioł «piedafiličnaj arhanizacyjaj». Ale hrošy, vidać, nie pachnuć».
Čytajcie taksama: Papa Francišak: Finansavyja skandały škodziać dobramu imieni Kaścioła
Nie vielmi dypłamatyčnym byŭ i ksiondz Jury Barok: «Paskudstvam zajmaješsia, Ihar… Mety nie apraŭdvajuć srodkaŭ! A kamiani i cehła nie zamieniać žyvych duš. Kaścioł — heta nie toje, što ty buduješ».
Praź niekalki hadzin ksiondz Ihar Łašuk svoj post vydaliŭ.
Ksiandza Ihara Łašuka časam nazyvajuć «ksiandzom-budaŭnikom». Ën uźvioŭ kaścioły ŭ minskaj Sierabrancy, ruščycaŭskim Bahdanavie, a ciapier buduje ŭ Stoŭbcach.