Žurnalistu Paŭłu Padabiedu prypisvajuć «uvachodžańnie ŭ skład ekstremisckaha farmavańnia»
Biełaruskaj asacyjacyi žurnalistaŭ staŭ viadomy dakładny kryminalny artykuł, na padstavie jakoha ŭ minskim SIZA ŭtrymlivajuć videaapieratara-fryłansiera Paŭła Padabieda. Jamu inkryminujuć «uvachodžańnie ŭ skład ekstremisckaha farmavańnia», maksimalnaja sankcyja praduhledžvaje da 6 hadoŭ źniavoleńnia.
20.04.2023 / 12:50
Pra vystaŭlenaje abvinavačvańnie stała viadoma z kopii pastanovy na aryšt pryvatnaha aŭtamabila Paŭła Padabieda, ekśpiertyza i acenka jakoha, jak akazałasia, pravodzilisia jašče na pačatku sakavika biez paviedamleńnia svajakam. U pryvatnaści, nakładajecca zabarona na prodaž transpartnaha srodku.
Siarod inšaha, u dakumiencie paznačana, što žurnalistu pradjaŭleny art. 361-1, č. 3 Kryminalnaha kodeksa — «uvachodžańnie asoby ŭ skład ekstremisckaha farmavańnia ŭ metach učynieńnia złačynstva ekstremisckaj nakiravanaści (udzieł u ekstremisckim farmavańni)». Takoje «złačynstva» karajecca abmiežavańniem voli da 4 hadoŭ abo nakiravańniem u kałoniju na termin ad 2 da 6 hadoŭ.
Akramia taho, z toj ža pastanovy vynikaje, što Pavieł Padabied «udzielničaŭ u niesankcyjanavanych akcyjach/dziejańniach 14 lipienia 2020 hoda i ŭ nastupnyja dni». U zhadanyja daty prachodzili pratesnyja akcyi suprać rašeńnia Centrvybarkama Biełarusi admović u rehistracyi pretendentam na ŭdzieł u prezidenckaj kampanii ŭžo aryštavanamu eks-bankiru Viktaru Babaryku i byłomu kiraŭniku Parka vysokich technałohij Valeryju Capkału. Tady i niezaležnyja, i dziaržaŭnyja ŚMI aktyŭna aśviatlali pieradvybarčyja batalii, tamu znachodžańnie na vulicy videaapieratara Paŭła Padabieda całkam łahičnaje.
Sam Pavieł Padabied jašče raniej paviedamiŭ u listach, što admoviŭsia davać suprać siabie pakazańni na etapie śledstva i ciapier u čakańni pieradačy spravy prakuroru i dalejšaha nakiravańnia ŭ sud. Siońnia jakraz try miesiacy, jak jon za kratami.
Paŭła Padabieda zatrymali sioleta 20 studzienia. Siłaviki «zahłybilisia» ŭ jaho sacsietki ažno da 2012 hoda i na padstavie starych repostaŭ abvinavacili ŭ raspaŭsiudžvańni «ekstremisckich materyjałaŭ» — niahledziačy na toje, što padobnych statusaŭ u niezaležnych ŚMI ŭ toj čas nie było jak źjavy. Sud udavacca ŭ niuansy nie pažadaŭ i na padstavie administracyjnaha artykuła 19.11 pakaraŭ žurnalista 15 sutkami aryštu z adbyćciom u IČU Minskaha rajona.
Adnak napiaredadni mierkavanaha vyzvaleńnia jaho zabrali na dopyt, paśla čaho pieraviali ŭ śledčy izalatar na vulicy Vaładarskaha. I ŭžo tam pradjavili «spryjańnie ekstremizmu». 28 lutaha pravaabarončaja supolnaść pryznała Paŭła Padabieda palityčnym viaźniem.
Čytajcie taksama:
«Nie za harami toj čas, kali biełarusy zmohuć žyć ščaśliva». Maryna Zołatava napisała list z turmy
Ad 4 da 14 hadoŭ pazbaŭleńnia voli. Vyniesieny prysud pa spravie «BiełaPAN»