Сяргей Макарэвіч выйшаў на волю
Як стала вядома «Нашай Ніве», менеджара культуры Сяргея Макарэвіча выпусцілі пасля пяці месяцаў за кратамі. Інфармацыі пра яго справу амаль няма.
12.04.2023 / 11:41
Сяргей Макарэвіч адразу пасля вызвалення з турмы Гродна. Скрыншот са сторыз у інстаграме ягонай жонкі
Сяргея Макарэвіча затрымалі 4 лістапада пасля ператрусу ў яго дома. Меркавалася, што ён праходзіць па справе «Маёнтка Падароск». Як і фонд «Вяртанне», у якім працаваў Сяргей, «Маёнтак Падароск», ініцыятыва па аднаўленні старой сядзібы пад Ваўкавыскам, фінансаваліся бізнэсоўцам і мецэнатам беларускага паходжання Паўлам Падкарытавым.
Фонд «Вяртанне» падтрымліваў шматлікія праекты беларускай культуры. Ён быў ліквідаваны ў канцы кастрычніка рашэннем Мінскага гарадскога суда, у шэрагу іншых незалежных грамадскіх і культурных арганізацый.
Праваабаронцы прызналі Сяргея Макарэвіча палітвязнем.
Увесь гэты час Сяргей знаходзіўся ў гродзенскай турме №1. За яго вызваленне актыўна змагалася сям'я.
Між сяброў Макарэвіча ходзіць інфармацыя, што вызваленне пад паручальніцтва яму прапанаваў следчы на мінулым тыдні. І вось, паручальнікаў удалося знайсці.
«Наша Ніва» пакуль не мае пацвярджэння гэтай інфармацыі з іншых крыніц і не ведае, хто стаў паручальнікам.
Інфармацыі пра справу Макарэвіча, як і пра большасць палітычных спраў, практычна няма ў выніку таго, што лукашысты цяпер інтэрпрэтуюць падпіску пра неразгалошванне, якую бяруць як з фігурантаў спраў, так і з адвакатаў, незаконна шырока. У выніку ўсё, што вядома грамадству, — што справа існуе.
Калі вам вядомыя падрабязнасці, паведамляйце асабіста тым аўтарам «Нашай Нівы», якіх ведаеце, або ў тэлеграм-акаўнт «Нашай Нівы» ў сакрэтны чат: @nn_editor.
Каму зручней на мэйл — пішыце рэдактару на мэйлы nivanasha@gmail.com ці nivanasha@proton.me.