«Pradajecca ŭ suviazi ź pierajezdam». Ci šmat biełarusaŭ pradaje mašyny z-za emihracyi?
Pa acenkach ryełtaraŭ, kala traciny kvater u Minsku pradajecca pa davieranaści. Da 2020 hoda dola takich ździełak składała ŭsiaho 3—5 %. Na imklivy rost ździełak z vykarystańniem davieranaściaŭ u pieršuju čarhu ŭpłyvaje masavaja emihracyja. «Naša Niva» pacikaviłasia, ci jość padobnyja pracesy na biełaruskim aŭtamabilnym rynku.
08.04.2023 / 20:09
«My stali čaściej sutykacca ź situacyjaj, kali aŭtamabil pradajecca pa davieranaści»
Mieniedžar adnaho z bujnych staličnych aŭtakamisaŭ kaža, što za apošni hod sapraŭdy pavialičyłasia kolkaść klijentaŭ, jakija pradajuć mašynu ŭ suviazi sa źmienaj krainy pražyvańnia.
«Ludzi, jakija tolki płanujuć adjezd i znachodziacca ŭ Biełarusi, zvyčajna bolš zhavorlivyja pa canie, bo ŭ ich staić zadača nie pradavać aŭtamabil ciaham 1—2 miesiacaŭ, a zrabić heta za 1—2 tydni. Zvyčajna jany adrazu adznačajuć hety fakt na stadyi abmierkavańnia cany.
My stali čaściej sutykacca ź situacyjaj, kali aŭtamabil pradajecca pa davieranaści. Choć niejkaj asobnaj statystyki ŭ našym sałonie z hetaj nahody niama, možna skazać, što kali hady try tamu heta byli adzinkavyja vypadki, to letaś heta ŭžo stała bolš-mienš zvyčajnaj źjavaj.
U takich vypadkach ułaśnik najčaściej znachodzicca za miažoj, a prodažam aŭto, jak praviła, zajmajucca baćki ci inšyja svajaki abo siabry», — kaža surazmoviec.
Pa słovach mužčyny, asabliva vyrazna takaja tendencyja pačała naziracca ŭ druhoj pałovie minułaha hoda.
«Mahčyma, heta źviazana z adtokam ajcišnikaŭ, bo, jak praviła, ludzi, jakija kazali, što pradajuć mašynu ŭ suviazi ź pierajezdam, vystaŭlali na prodaž davoli śviežyja aŭtamabili. Kali paraŭnoŭvać situacyju ź minułymi hadami, to kolkaść ludziej, jakija pradajuć aŭto nibyta z pryčyn emihracyi, značna pavialičyłasia.
Ale heta ŭsio adno nie nadta masava», — padsumoŭvaje śpiecyjalist.
«Mašyn, ad jakich ludzi pazbaŭlajucca praz adjezd za miažu, stała bolš»
Naš inšy surazmoviec — ułaśnik aŭtakamisa ŭ adnym z abłasnych centraŭ krainy. Mužčyna taksama paćviardžaje, što na jahonaj placoŭcy apošnim časam takija aŭto stali źjaŭlacca značna čaściej, čym raniej.
«My pracujem z 2017 hoda, pieršyja hady pracy ja asabliva nie zhadvaju, kab da nas čaściakom pryjazdžali klijenty, jakija pradajuć aŭto pa davieranaści, bo ŭłaśnik znachodzicca za miažoj. Kali takija i byli, to heta byli adzinkavyja vypadki», — zhadvaje mužčyna.
Pa słovach biznesoŭca, prodaž aŭto biełarusaŭ, jakija źjechali, pačaŭ nabirać abaroty z druhoj pałovy 2021 hoda.
«Ludzi davoli masava pačali zjazdžać jašče ŭ 2020-m, ale tak jak mnohija zjazdžali za miažu mienavita na mašynie, to spačatku nijakich źmien nie zaŭvažałasia.
Potym, vidać, uładkavaŭšysia za miažoj, ludzi stali zadumvacca ab prodažy biełaruskaha aŭto, bo ŭ Jeŭropie mašyny kaštujuć značna tańniej i vialikaha sensu trymać aŭtamabil na biełaruskaj rehistracyi za miažoj niama», — razvažaje biznesmien.
Pa nazirańniach aŭtakamisijaniera, niedzie ź leta-vosieni minułaha hoda mašyn, ad jakich pazbaŭlajucca biełarusy, jakija zjechali za miažu, stała bolš.
«Nie mahu skazać, što heta pavalny trend, ale sapraŭdy takija vypadki, kali mašynu na kamisiju staviać pa davieranaści svajaki ŭłaśnika, pierastali być redkaściu», — kaža mužčyna.
Pradajecca ŭ suviazi ź pierajezdam
My pahladzieli, jakaja kolkaść pradaŭcoŭ paznačaje pierajezd za miažu jak pryčynu prodažu mašyny.
Na najbujniejšaj placoŭcy pa prodažy aŭto ŭ Biełarusi raźmieščana bolš za 50 tysiač abjaŭ. Ź ich 228 źmiaščajuć u apisańni da aŭtamabila frazu «ŭ suviazi ź pierajezdam».
Skrynšot z sajta av.by
Cikava, što amal pałova z hetych mašyn kaštuje daražej za 15 tysiač dalaraŭ.
«Nielha skazać, što paznaka ŭ abjavie «terminova pradajecca ŭ suviazi ź pierajezdam» aŭtamatyčna aznačaje, što čałaviek hatovy da hruntoŭnaha torhu, ale časam takoje zdarajecca, bo niekatoryja ludzi prosta chočuć jak maha chutčej pazbavicca ad aŭto», — zaŭvažaje pierakup.
Taksama mužčyna adznačyŭ, što za apošni hod staŭ čaściej natykacca na abjavy, dzie aŭtamabil pradaje niejkaja davieranaja asoba, a nie ŭłaśnik mašyny.
«Niechta adrazu kaža pra toje, što mašyna, naprykład, syna, a jon ciapier žyvie nie ŭ Biełarusi. Niekatoryja pačynajuć pieranakiroŭvać na inšy numar u niejki miesiendžar da ŭłaśnika, kab toj moh bolš dakładna raspavieści pra svaju mašynu», — kaža pierakupščyk.
Niejkaja častka pradaŭcoŭ, jakija addajuć aŭto «ŭ suviazi ź pierajezdam», moža być banalnymi pierakupami.
Skrynšot z sajta av.by
«Kaniečnie, takich budzie niašmat, ale niekatoryja kalehi pa cechu, karystajučysia situacyjaj, kali takich mašyn stała značna bolej, sapraŭdy mohuć pačać prydumlać bajki, što pradajuć mašynu svajaka ci siabra, jaki źjechaŭ za miažu i paprasiŭ dapamahčy z prodažam», — źviartaje ŭvahu surazmoviec.
Čytajcie taksama:
Paśla pierasiačeńnia biełaruskaj miažy mašyny ź Jeŭropy «hublajuć» dziasiatki tysiač kiłamietraŭ. Jak pradaŭcy padmanvajuć z prabieham aŭto
«Dastery» za 30 000 dalaraŭ, «Viesty» za 16 500. Jakija novyja aŭto prapanujuć dylery