Cichanoŭskaja sustrełasia z kiraŭnicaj MUS Litvy. Abmierkavali zakonaprajekt ab biełarusach, humanitarny DNŽ i stvareńnie pracoŭnaj hrupy pry MUS
Śviatłana Cichanoŭskaja padziakavała kiraŭnicy MUS Litvy Ahnie Biłatajcie za pačutyja i pryniatyja prapanovy biełarusaŭ pa źmienach u zakonaprajekt «Ab uviadzieńni abmiežavalnych mier u dačynieńni da vajennaj ahresii suprać Ukrainy».
05.04.2023 / 15:01
Śviatłana Cichanoŭskaja i Ahnie Biłatajcie. Fota: motolko.help
Cichanoŭskaja vykazała padziaku ad imia biełarusaŭ za toje, što ŭ novaj viersii zakonaprajekta abmiežavalnyja miery ŭ dačynieńni da hramadzian Biełarusi značna źmiakčanyja ŭ paraŭnańni ź pieršapačatkovym prajektam. Cichanoŭskaja padkreśliła važnaść padziełu biełarusaŭ i režymu Łukašenki, paviedamlaje Motolko.Help sa spasyłkaj na telehram-kanał Cichanoŭskaj.
Cichanoŭskaja padziakavała kiraŭniku Departamienta mihracyi MUS Litvy Evielinie Hudzinskajcie za kanstruktyŭnaje supracoŭnictva pa pastupalnym vyrašeńni pytańniaŭ, ź jakimi davodzicca sutykacca biełarusam, jakija vymušana pakinuli Biełaruś z-za pahrozy palityčnaha pieraśledu.
U chodzie pieramoŭ Cichanoŭskaja i Biłatajcie damovilisia stvaryć pracoŭnuju hrupu, jakaja budzie ŭklučać pradstaŭnikoŭ Abjadnanaha pierachodnaha kabinieta, OST i MUS Litvy dla vyrašeńnia pytańniaŭ u halinie mihracyi i hramadskaj biaśpieki. Padobnaja hrupa ŭ Polščy pakazała svaju zapatrabavanaść i efiektyŭnaść: dziakujučy joj u Polščy źjaviŭsia humanitarny DNŽ dla biełarusaŭ, a prajazny dakumient zamiest pašparta staŭ biaspłatnym.
Na sustrečy abmiarkoŭvalisia mahčymaści spraścić patrabavańni dla biełarusaŭ pry padačy na DNŽ, u pryvatnaści, kab była mahčymaść nie pradstaŭlać daviedku ab niesudzimaści abo apastyl dla tych hramadzian Biełarusi, jakija nie mohuć viarnucca ŭ Biełaruś.
U bližejšy čas Departamient mihracyi płanuje vypuścić padrabiaznuju instrukcyju, jakaja tłumačyć detali pracedur lehalizacyi biełarusaŭ u Litvie.
Śviatłana Cichanoŭskaja ŭźniała pytańnie vydačy na bolš doŭhi pieryjad DNŽ pa humanitarnych padstavach, što taksama spraściła b atrymańnie pašparta zamiežnika. U adkaz na zapyt paskoryć pryniaćcie rašeńniaŭ pa mižnarodnaj abaronie litoŭski bok zapeŭniŭ, što pytańnie zajavak biełarusaŭ znachodzicca na kantroli i zapazyčanaść tłumačycca nieabchodnaściu pravierki na biaśpieku i apracoŭki vialikaj kolkaści zajavak ad ukrainskich biežancaŭ.
Čakajecca, što da siaredziny 2023 hoda hetaja zapazyčanaść budzie likvidavanaja, i biełaruskija zajaŭki buduć razhladacca zhodna z ustanoŭlenymi terminami. Nahadajem, što Litva — adna ź lidaraŭ u ES pa adsotku stanoŭčych chadajnictvaŭ na vydaču mižnarodnaj abarony dla biełarusaŭ.
Ministr Biłatajcie zapeŭniła Cichanoŭskuju, što Litva i litoŭski MUS praciahnuć i dalej padtrymlivać biełarusaŭ u mihracyjnych pytańniach. Ciapier u Litvie pražyvaje bolš za 49 000 biełarusaŭ. Heta druhaja paśla hramadzian Ukrainy zamiežnaja dyjaspara ŭ Litvie.
Pavodle niadaŭnich sacyjałahičnych daśledavańniaŭ, blizu 95% biełarusaŭ u Litvie dekłarujuć, što padtrymlivajuć ukrainski bok u kanflikcie, a astatnija vybrali varyjant «nie padtrymlivajuć nivodzin z bakoŭ».
Čytajcie taksama:
Prezident Litvy acenić abmiežavańni dla hramadzian RF i Biełarusi: Sankcyi pavinny być adnolkavymi
Daradca prezidenta Litvy pra abmiežavańni dla biełarusaŭ: Padčas vajny heta nieabchodna