У Кітаі заявілі, што не падтрымліваюць ваенную агрэсію Расіі і не прызнаюць Крым расійскім
А заява пра «бязмежнае сяброўства» — проста рыторыка.
05.04.2023 / 12:04
Фота: The Associated Press
Заява аб «бязмежнай дружбе» паміж Масквой і Пекінам не больш чым рытарычны прыём. Пра гэта заявіў пасол Кітая ў Еўрапейскім саюзе Фу Цун перад размовай з прэзідэнтам Францыі Эманюэлем Макронам і кіраўніком Еўракамісіі Урсулай фон дэр Ляен, паведамляе The New York Times.
Па словах кітайскага дыппрадстаўніка, крытыкі няправільна інтэрпрэтуюць заяву лідараў дзвюх краін аб супрацоўніцтве. «[Дружба] без абмежаванняў» — гэта не што іншае, як рыторыка», — сказаў ён, каментуючы мінулагоднюю дэкларацыю прэзідэнта Расіі Уладзіміра Пуціна і кіраўніка КНР Сі Цзіньпіна.
Фу Цун таксама заявіў, што Пекін не выступае ў падтрымку ваеннай аперацыі ва Украіне, не прызнае Крым расійскім, як і тэрыторыі, якія ўвайшлі ў склад Расіі па выніках рэферэндумаў мінулай восені, і не аказвае вайсковую дапамогу Маскве.
Сумесная заява лідараў дзвюх краін, у якой гаварылася, што сяброўства паміж Расіяй і Кітаем «не мае меж», а ў супрацоўніцтве «няма забароненых зон», была падпісана пасля візіту прэзідэнта Расіі Уладзіміра Пуціна ў Кітай у пачатку лютага мінулага года. Тады ён прыбыў у Пекін на адкрыццё зімовай Алімпіяды, а таксама правёў перамовы з кіраўніком КНР.
У дакуменце, падпісаным пасля гэтай сустрэчы, таксама гаворыцца, што бакі, сур'ёзна занепакоеныя «выклікамі ў сферы міжнароднай бяспекі», выступаюць супраць пашырэння НАТА і заклікаюць адмовіцца ад падыходаў часоў халоднай вайны.
Чытайце таксама:
Кітай прапанаваў не размяшчаць ядзерную зброю за мяжой
У Кітаі лічаць, што яго планы паставак зброі Расіі сталі вядомыя з-за ўцечак у Маскве
Кітай апублікаваў сваю пазіцыю па ўрэгуляванні канфлікту ва Украіне