Dzie praściej atrymać vizu ŭ Jeŭropu?
Pacikavilisia, jakija krainy ciapier achvotniej vydajuć biełarusam vizy ŭ Šenhienskuju zonu. Turahienty nazyvajuć čatyry krainy.
08.04.2023 / 12:33
Polšča — pa zaprašeńni
Heta kraina nie vydaje biełarusam turystyčnych viz, ale atrymać polskuju vizu mahčyma. Varyjantaŭ niekalki.
Samy prazrysty, ale nie samy prosty sposab — mieć zaprašeńnie ad hramadzianina Polščy abo biełarusa z PMŽ (Karta Stałego Pobytu). Pry najaŭnaści zaprašeńnia vy zmožacie atrymać hadavuju nacyjanalnuju vizu typu D. Kab zaprasić biełarusa ŭ hości, hramadzianin Polščy, jak i ŭładalnik pastajannaha DNŽ, nie abaviazkova musić być jamu svajakom. Tamu tearetyčna zaprasić vas u Polšču moža luby pastajanny žychar hetaj krainy. Ale treba viedać, što z heta hoda krychu ŭskładniŭsia miechanizm afarmleńnia zaprašeńnia.
Zaprašeńnie robicca ciaham miesiaca, tamu vizu ŭ lepšym vypadku vy atrymajecie tolki praz 1,5—2 miesiacy.
Tym, u kaho niama takich znajomych, zaprašeńni prapanujuć rabić pasiaredniki. Jany pradajuć zaprašeńni pa 350 jeŭra za štuku. Jašče 150 rubloŭ jany biaruć za rehistracyju na padaču.
Pracoŭnyja vizy z «lipavymi» damovami
Praściej, chutčej i tańniej možna atrymać polskuju pracoŭnuju vizu. Pasiaredniki pradajuć kamplekt dakumientaŭ, nieabchodny dla padačy na pracoŭnuju vizu, za 150 jeŭra. Za zapis na padaču zajavy i zapaŭnieńnie ankiety biaruć jašče 200—250 rubloŭ.
Niekatoryja pasiaredniki razam z dakumientami, patrebnymi niepasredna dla padačy na vizu, za dadatkovyja 100—200 rubloŭ prapanujuć pracoŭny kantrakt sa štampam ad firmy, jakaja nibyta zaprasiła vas na pracu. Inšyja nie pradajuć ich navat za dadatkovyja hrošy. Adznačym, što pracoŭny kantrakt davoli važnaja reč, bo polskija abo litoŭskija pamiežniki mohuć zapatrabavać dokazy taho, što vy sapraŭdy jedziecie ŭ Polšču na pracu.
Skarystaŭšysia takimi pasłuhami, vy zmožacie atrymać hadavuju, a časam paŭhadavuju pracoŭnuju vizu ŭžo praz try tydni.
Ale z pracoŭnaj vizaj nie ŭsio tak prosta. Časam u tych, chto ŭžo skarystaŭsia takoj mahčymaściu, ale na pracu ŭ Polšču tak i nie pajechaŭ, mohuć uźnikać składanaści pry nastupnym atrymańni vizy praz toje, što papiaredniaja viza vykarystoŭvałasia nie pa pryznačeńni.
Pakul heta nie maje masavaha charaktaru, ale takija vypadki sustrakajucca.
Dziełavyja vizy dla IP i nie tolki
Jašče adzin davoli raspaŭsiudžany typ polskich viz — tak zvanyja dziełavyja vizy. Praŭda, atrymać ich mohuć tolki tyja biełarusy, chto maje IP abo firmu ŭ Biełarusi. Pry nieabchodnaści dziełavuju vizu možna zrabić i kamu-niebudź sa svaich supracoŭnikaŭ. Firmy-pasiaredniki hatovyja padrychtavać pakiet nieabchodnych dla padačy dakumientaŭ za 1350 rubloŭ na čałavieka.
Asnoŭny plus hetaha typu viz u tym, što ich vydajuć terminam da 5 hadoŭ. Naturalna, nichto nie moža harantavać, što vam dakładna vydaduć vizu adrazu na 5 hod, ale takoje byvaje. Časam biznesoŭcy atrymlivajuć vizu na 2—3 hady.
Vienhryja, Francyja, Italija
Siarod krain, jakija achvotna adkryvajuć biełarusam turystyčnyja vizy, turahienty i firmy, jakija śpiecyjalizujucca na vizavych pytańniach, nazyvajuć Francyju, Italiju i Vienhryju.
Chutčej za ŭsio možna atrymać vienhierskuju vizu, ale naŭrad ci heta budzie hadavaja viza, tamu tym, chto asabliva nie śpiašajecca, rajać pryhladacca da Italii abo Francyi. Za pasiarednictva ŭ atrymańni vienhierskaj turystyčnaj vizy biaruć pa 900 rubloŭ z čałavieka. Čas čakańnia — da adnaho miesiaca.
Vienhryja vydaje biełarusam nie tolki turystyčnyja vizy, ale i vizy pa zaprašeńni dla naviedvańnia svajakoŭ ci siabroŭ, a taksama dziełavyja vizy.
Kab samastojna padacca na turystyčnuju vizu, vam nieabchodna budzie mieć paćvierdžanuju broń haścinicy ź pieradapłataj. Z poŭnym śpisam patrabavańniaŭ dla atrymańnia vienhierskaj vizy možna aznajomicca pa spasyłcy.
Taksama varta viedać, što ad 1 krasavika padacca na vienhierskuju vizu možna tolki praź vizavyja centry.
Strasburh, Francyja
Atrymać turystyčnuju italjanskuju abo francuzskuju vizu vyjdzie nie raniej za kaniec maja — pačatak červienia. Košt pasiarednickich pasłuh — 650 jeŭra.
Pasiaredniki śćviardžajuć, što klijenty z dobraj vizavaj historyjaj mohuć raźličvać na atrymańnie vizy na hod i navat dva. Z tymi, chto raniej nie mieŭ vizy, składaniej, asabliva ź italjanskim kirunkam. Tym nie mienš, ludzi ŭ temie kažuć, što Francyja i Italija apošnim časam dobra vydajuć biełarusam turystyčnyja vizy i redka kryŭdziać karotkimi terminami dziejańnia.
U teoryi možna zapisacca i padacca na atrymańnie francuzskaj turystyčnaj vizy samastojna. Robicca heta praz sajt. Siarod inšaha vam spatrebicca paćviardžeńnie reziervacyi arhanizavanaj pajezdki albo inšy dakumient, jaki źmiaščaje prahramu pajezdki, braniravańnie haścinicy i hrošy ŭ pamiery nie mienš za 120 jeŭra na sutki. Z poŭnym śpisam patrabavańniaŭ možna aznajomicca padčas adkazu na pytańni na sajcie.
Ci adkryvali vy niadaŭna vizu ŭ Jeŭropu? Možacie padzialicca svaim dośviedam.
Čytajcie taksama: