Raspaviadajem, što viadoma pra Darju Trepavu, jakaja pieradała vajennamu prapahandystu Tatarskamu załatuju statuetku
Dziaŭčynu zatrymali siońnia ranicaj. Jana vučyłasia na miedfaku i skardziłasia, što na lekcyjach jaje adnahrupniki «ŭklučajuć pieśni pucinskich śpievakoŭ».
03.04.2023 / 15:39
Dźmitryj Ryłaŭ i Darja Trepava ŭ aŭtazaku paśla akcyi 24 lutaha. Fota: telehram kanał «ŁPR Pieciarburh»
Dziaŭčynie 26 hadoŭ, jana z Sankt-Pieciarburha. Trepava vydatna vučyłasia i zdała ADE (adziny dziaržaŭny ekzamien) pa ruskaj movie na 100 bałaŭ.
Paśla Darja vučyłasia na miedfaku Sankt-Pieciarburhskaha dziaržaŭnaha ŭniviersiteta i padpracoŭvała ŭ Klinicy vysokich miedycynskich technałohij imia Pirahova. U apošni čas jana pradavała rečy i aksesuary praź internet i davoli dobra na hetym zarablała.
Trepava prytrymlivałasia antypucinskich i antyvajennych pohladaŭ. Jana była zarehistravanaja na płatformie «Razumnaje hałasavańnie» Navalnaha, a jašče padčas navučańnia skardziłasia, što ciaham lekcyj jaje adnahrupniki «ŭklučajuć pieśni pucinskich śpievakoŭ».
Taksama jana chadziła na demanstracyi — u dzień pačatku vajny jaje zatrymlivali padčas akcyi pratestu. Jana atrymała 10 sutak aryštu.
Muž dziaŭčyny — libiertaryjaniec Dźmitryj Ryłaŭ. U intervju ŚMI jon skazaŭ, što ŭpeŭnieny, što dziaŭčynu padstavili:
«Heta poŭnaje tryźnieńnie. Jana była absalutna ŭpeŭnienaja ŭ tym, što ŭ padarunku budzie znachodzicca niejkaja pryłada, jakaja dazvolić atrymać dostup da čałavieka i naŭrad ci budzie vyjaŭlenaja adrazu, a mahčyma, nikoli. Ale heta dakładna nie pavinna była być bomba».
Paśla pačatku vajny jany vyjechali z Rasii i pierajechali ŭ Hruziju, ale praz paŭhoda dziaŭčyna viarnułasia. Pa źviestkach niekatorych ŚMI, jana na dniach źbirałasia pakinuć Rasiju.
Čytajcie taksama:
Zatrymali dziaŭčynu, jakuju padazrajuć u datyčnaści da zabojstva Uładlena Tatarskaha