Былыя актывы «Беларуснафты» ва Украіне перайшлі Рынату Ахметаву
Кампанія «Нафтагазэнергія«, якая ўваходзіць у энергетычную групу ДТЭК, падкантрольную буйному ўкраінскаму бізнэсмену Рынату Ахметаву, атрымала ў кіраванне долю і маёмасць прадпрыемства «Сэрвіс Ойл». Такім чынам аформленая перадача былых актываў «Беларуснафты» ва Украіне, піша Office Life.
30.03.2023 / 18:29
Рынат Ахметаў
ТАА «Сэрвіс Ойл» было зарэгістравана «Беларуснафтай» у Палтаве ў 2012 годзе для аказання сэрвісных паслуг украінскім нафтагазаздабыўчым кампаніям. У ліку галоўных замоўцаў прадпрыемства тады фігуравалі вышэйзгаданы холдынг Рыната Ахметава ДТЭК і дзяржаўны газаздыбыўца «Укргазздабыча».
У канцы 2021-га ўласнікам «Сэрвіс Ойл» замест «Беларуснафты», якая тады ж трапіла пад санкцыі Еўрасаюза, стала кампанія «Пухавічынафтапрадукт».
У чэрвені 2022 года актывы «Сэрвіс Ойл», уключаючы долю ў статутным фондзе і маёмасць (на той момант агульным коштам каля 135 млн даляраў), былі арыштаваныя кіеўскімі ўладамі і перададзеныя ў распараджэнне Агенцтва па вышуку і менеджменце актываў. Апошняе ў снежні мінулага года правяло конкурс па перадачы ў кіраванне маёмасці беларускай кампаніі.
Пераможцам конкурса была абвешчаная кампанія «Нафтагазэнергія». У пералік маёмасці, якой цяпер распараджаецца структура Рыната Ахметава, уваходзяць некалькі буравых і калцюбінгавая ўстаноўкі, транспартныя сродкі, трубы і г. д.
Чытайце таксама:
З Беларусі сыходзіць «Метінвест Дыстрыбуцыя» Рыната Ахметава
Самы багаты чалавек Украіны адмаўляецца ад свайго медыйнага бізнэсу
«Беларуснафта» стане актыўней гандляваць харчамі. І не толькі на АЗС