«Dastery» za 30 000 dalaraŭ, «Viesty» za 16 500. Jakija novyja aŭto prapanujuć dylery
Pahladzieli, jakija novyja mašyny možna nabyć u aficyjnych dyleraŭ paśla sychodu suśvietnych aŭtavytvorcaŭ z Rasii.
02.04.2023 / 18:05
Zdymak ilustracyjny. Fota: geely.by
Praz vajnu i sankcyi z Rasii syšli amal usie suśvietnyja aŭtavytvorcy, što ŭ istotnaj stupieni paŭpłyvała i na biełaruski rynak novych aŭto, tak jak bolej za 80% aŭto, jakija pradavalisia ŭ sałonach biełaruskich dyleraŭ, vyrablałasia na terytoryi RF.
Volkswagen
Aŭtamabili marki VW, jakija prapanoŭvajucca biełaruskimi dylerami, ciapier składana nazyvać «narodnymi», bo na vybar prapanujuć try darahija madeli. Mikraaŭtobusy Caravelle i Multivan, a taksama pazadarožnik Touareg. Kaštujuć takija mašyny ad 179 900 da amal 300 tysiač rubloŭ, što składaje kala 63 — 100 tysiač dalaraŭ.
Skrynšot z sajta volkswagen-minsk.by
Vyšejnazvanyja madeli impartujuć u Biełaruś ź Jeŭropy. Biestsieler VW Polo, jaki vyrablaŭsia ŭ RF, užo daŭno skončyŭsia, bo zavod VW u Rasii bolš nie pracuje.
Audi
U adroźnieńnie ad VW, u biełaruskaha dylera Audi vybar madelej davoli šyroki.
Skrynšot z sajta audi.by
Samaja tannaja ź ich — Audi a4, ceny na jakuju startujuć z adznaki 138 665 rubloŭ ($48 650). Audi q5 kaštuje ad 203 465 rubloŭ ($71 400).
Skrynšot z sajta audi.by
Madel e-tron — najdaražejšaja z Audi, jakija pradajucca ŭ Biełarusi. Elektramabili kaštujuć ad 108 459 da 146 539 jeŭra (kala 336 — 454 tysiač rubloŭ).
Renault
U «Reno» ŭsio jašče zastalisia minułahodnija reštki mašyn, vyrablenyja na zavodzie ŭ Rasii. Samaja tannaja viersija Logan Stepway ciapier kaštuje 50 900 rubloŭ (kala $17 850). Viersija z bolš mocnym ruchavikom i lepšaj kamplektacyjaj pradajecca na 9 tysiač rubloŭ daražej — 59 900 rubloŭ, abo bolš za 21 tysiaču dalaraŭ. Novych pastavak Logan nie budzie, bo kancern zakryŭ zavod u Rasii.
Madeli Duster i Arkana kaštujuć pryblizna adnolkava — u rajonie 84 tysiač rubloŭ, što biez małoha składaje 30 tysiač dalaraŭ.
Skrynšot z sajta renaultshop.by
Ceny na Renault Coleos — ad 129 da 138 tysiač rubloŭ. Aŭtamabili, jakija prapanujuć dylery Renault u Biełarusi, syšli z kanviejera jašče ŭ 2022—2021 hadach.
LADA
U adroźnieńnie ad zavoda Renault, zavod LADA praciahvaje vypuskać novyja aŭtamabili, choć i adčuvaje prablemy praź niedachop zamiežnych kamplektujučych. Hetaja situacyja adlustroŭvajecca na kamplektacyi mašyn, vypuščanych u vajenny pieryjad. Vytvorca vymušany źnižać ekałahičny kłas, pazbaŭlać aŭto takich opcyj, jak ABS, paduški biaśpieki, kandycyjanier i h.d.
Tak, naprykład, «antysankcyjnuju» Granta pradajuć pa cenach ad 38 500 rubloŭ (kala $13 500). Cikava, što ŭ 2018 hodzie «Hranty» pradavalisia za 7200 — 10 200 dalaraŭ.
Skrynšot z sajta lada.by
LADA Westa ŭ zaležnaści ad kamplektacyi kaštuje ad 47 da 62 tysiač rubloŭ (16 500 — 21 750 dalaraŭ).
KIA
«Narodnych» madelej marki KIA ŭ Biełarusi nabyć nie atrymajecca. Niekali papularnych siarod biełaruskich aŭtaamataraŭ Rio i Rio Ch u prodažy niama. Samaja tannaja madel ciapier — heta Seltos. Pradajecca jana pa cenach ad 83 900 rubloŭ, ci kala $29 500.
Skrynšot z sajta kia.by
Hyundai
U dylera Hyundai zastalisia reštki papularnaj raniej madeli Accent. Praŭda, jość tolki varyjanty ŭ topavaj kamplektacyi, tamu kaštuje taki aŭtamabil ažno 68 900 rubloŭ, ci kala 24 200 dalaraŭ.
Skrynšot z sajta hyundai.by
Parkietnik Creta pradajecca pa cenach ad 76 900 rubloŭ (kala $27 000).
Geely i inšy «Kitaj»
Biełaruska-kitajskija aŭtamabili Geely, jakija letaś stali samymi pradavanymi novymi aŭto ŭ Biełarusi, za apošnija niekalki miesiacaŭ dadali niekalki novych madelej. Siarod ich siedan Jemgrand.
U zaležnaści ad kamplektacyi jany pradajucca pa cenach ad 45 200 da 54 200 rubloŭ, ci kala 15 900 — 19 000 dalaraŭ, što robić hetuju madel adnoj z samych dasiažnych na biełaruskim rynku novych aŭto.
Skrynšot z sajta geely.by
U liniejcy Geely ŭ Biełarusi źjaviŭsia i svoj elektramabil. Geometry C kaštuje 99 900 rubloŭ (kala $35 000).
Kampaktny krasovier Geely Soolray pradajecca pa cenach ad 62 815 rubloŭ (kala $22 000). Siamimiesny džyp Okavango kaštuje 97 200 (kala $34 000).
Skrynšot z sajta geely.by
Samaja darahaja madel u liniejcy — Tugella. U zaležnaści ad kamplektacyi taki aŭtamabil pradajecca pa cenach ad 111 600 da 128 800 rubloŭ, ci kala 39 200 — 45 200 dalaraŭ.
Paralelna sa skaračeńniem asartymientu praz adsutnaść pastavak novych aŭto suśvietnych brendaŭ z rasijskich zavodaŭ, na biełaruskim rynku novych aŭto nazirajecca trend na kitaizacyiju.
JAC
Kitajski brend JAC prapanuje čatyry madeli koštam ad 71 da 101 tysiačy rubloŭ ($25 000 — 35 500).
Skrynšot z sajta jacminsk.by
Samy tanny ŭ liniejcy — kampaktny krasovier JS 4. U zaležnaści ad kamplektacyi takija aŭto kaštujuć 71 000 — 75 600 rubloŭ (25 — 26,5 tysiačy dalaraŭ).
Shery
Kitajskija Shery pradstaŭleny ŭ Minsku adrazu piaćciu madelami. Usie jany ŭvachodziać u katehoryju krasovieraŭ. Samy tanny ź ich — kampaktny krasovier Tiggo 4. Ceny na takija aŭto pačynajucca z 63 200 rubloŭ, što składaje kala 22 200 dalaraŭ.
Skrynšot z sajta chery.by
Samy darahi aŭtamabil ź liniejki Shery nahadvaje smartfony Apple. Madel zaviecca Tiggo 8 PRO MAX. Poŭnapamierny siamimiesny krasovier pradajecca pa cenach ad 132 900 da 144 400 rubloŭ ($46 600 — 50 600).
HAVAL
Inšy brend z Padniabiesnaj — Haval — taksama maje ŭ svajoj liniejcy tolki krasoviery i pikap.
Skrynšot z sajta haval.by
Samy tanny aŭtamabil u liniejcy hetaha kitajskaha vytvorcy, Haval Jolion, dasiažny pa cenach ad 65 900 rubloŭ ($23 150). Samym darahim aŭtamabilem z tych, što jość u najaŭnaści, źjaŭlajecca pikap GWM Poer, cana na jaki składaje 153 900 rubloŭ, abo kala 54 tysiač dalaraŭ.
Navat «karčy» padaraželi na 20-30%. Jak pa nazirańniach pradaŭcoŭ źmianilisia ceny na staryja aŭtamabili
«Takich «Aŭdzi» amal nie zastałosia». Pa jakich cenach biełarusy pradajuć narodnyja aŭtamabili
Jeŭrasajuz zabaraniaje paśla 2035 hoda vypuskać mašyny na bienzinie i dyzieli