Śniadanak — $150, asabistaja sustreča na dzień — $500. Błohierka z Hrodna vystaviła prajs-list na svaje pasłuhi. Usiaho 14 vidaŭ prapanoŭ
Hrodzienskaja instahram-błohierka jennie.t vykłała ŭ storyz śpis svaich pasłuh, jakija jana hatova akazać na płatnaj asnovie. U zaležnaści ad naboru pasłuh achvotnym daviadziecca zapłacić dziaŭčynie ad 150 da 1500 dalaraŭ. Pahladzieli, što jana prapanuje.
27.03.2023 / 19:20
Skrynšoty storyz jennie.t
«Zusim nie pradaju abo daŭno nie pradaju»
Błohierka z Hrodna anansavała prodaž łotaŭ, jakija možna nabyć ciaham 24 hadzin. Niekatoryja ź ich vyhladajuć davoli niezvyčajna dla Biełarusi.
«Uvodžu ŭ kurs spraŭ: siońnia ja budu pradavać łoty, jakija zvyčajna nielha kupić, bo ja ich abo zusim nie pradaju, abo daŭno nie pradaju», — pačynaje błohierka.
Prapanova dziejničaje ciaham 24 hadzin, kolkaść miescaŭ abmiežavanaja. U rasterminoŭku pasłuhi taksama nie pradajucca, papiaredžvaje dziaŭčyna.
Pieršy łot, jakija jana pradaje, nie vyklikaje ździŭleńnia, bo za 250 dalaraŭ jana prapanuje zapisać Reels pad tematyku akaŭnta zakazčyka. Paśla publikacyi karotkaha videa błohierka zrobić jahony repost sabie ŭ storyz.
«Vy atrymlivajecie kłasnaje videa + moj achop u storyz (ad 25 tysiač čałaviek i vyšej)», — havorycca ŭ apisańni.
Za 500 dalaraŭ jennie.t hatova pradać kompleksnuju rekłamu ŭ svaim akaŭncie.
200 dalaraŭ za hadzinu
Pa staŭcy 200 dalaraŭ błohierka-pradprymalnica moža prakansultavać vas pa viadzieńni staronki ŭ instahramie abo pravieści kansultacyi pa adkryćci biznesu z nula. U abodvuch vypadkach 200-dalaravyja kansultacyi buduć ciahnucca adnu hadzinu.
Skrynšoty storyz jennie.t
Taksama za 200 dalaraŭ błohierka hatovaja cełyja try hadziny vazić vas pa vašych spravach na jaje ŭłasnym Ford Mustang 2018 hoda vypusku.
Tańniej za ŭsio abydziecca śniadanak abo abied z błohierkaj — usiaho 150 dalaraŭ. Chto budzie płacić pa rachunku, nie ŭdakładniajecca.
Za $500 dziaŭčyna prapanuje asabistuju sustreču na ceły dzień. «Pravodzim dzień maksimalna cikava, razmaŭlajem na lubyja temy. Vy zaradžajeciesia, matyvujeciesia i paznajacie mianie krychu bližej», — havorycca ŭ apisańni da «łota» za 500 dalaraŭ.
Samaja darahaja pasłuha ad hrodzienskaj błohierki kaštuje 1500 dalaraŭ. Za hetyja hrošy dziaŭčyna hatovaja ceły tydzień vieści akaŭnt zamoŭščyka. Abiacaje prakačać jaho poŭnaściu, pisać dopisy, vykładać historyi i h. d.
Praz try hadziny paśla zapusku błohierka vyjšła ŭ storyz, dzie raspaviała, što nibyta ŭžo pradała adzin z łotaŭ za 1000 dalaraŭ.
Źjaŭleńnie takich łotaŭ dziaŭčyna tłumačyć žadańniem kinuć sabie vyklik i pravieryć, kolki hrošaj jana moža zarabić za adzin dzień. U storyz błohierka adznačaje, što jana pracuje tolki pa aficyjnych damovach, a ŭsie raźliki adbyvajucca praz rachunak, tamu z ahučanych cen jana budzie płacić padatak u pamiery 20%. Zaŭtra dziaŭčyna abiacaje ahučyć ličbu, na jakuju sumu ŭ jaje atrymajecca pradać svaje pasłuhi ciaham 24 hadzin.
Chto takaja jennie.t?
Dziaŭčyna žyvie ŭ Hrodnie, jaje sapraŭdnaje imia Jaŭhienija. Na biahučy momant Jaŭhienija maje 116 tysiač padpisčykaŭ. Jak piša jana sama, svoj asabisty brend jana raźvivaje ŭžo čatyry hady. Błohinh nie adziny zaniatak Ženi, taksama jana pradaje kursy pa stvareńni videa i anłajn-kursy pa pachudzieńni. Aproč hetaha, jana zajmajecca handlem, u Hrodnie ŭ jaje jość krama z dekoram, posudam i padarunkami.
«Džyzas krajst, its Žora Born». Najlepšyja tvity tydnia
Što za apieracyju zrabiŭ Kirkoraŭ, kab mieć kubiki na presie? Raskazvajem miechanizm