Cukierbierh pieraniaŭ u Maska siniuju ptušačku
Za sini značok dla vieryfikavanych akaŭntaŭ u Instagram i Facebook ciapier pryjdziecca płacić.
21.02.2023 / 18:10
Meta zapuściła pasłuhu padpiski pad nazvaj Meta Verified, jakaja dazvolić karystalnikam dadavać žadanuju siniuju ptušačku ŭ svaje ŭlikovyja zapisy ŭ Instagram i Facebook za 15 dołaraŭ u miesiac. Zapavietnaja siniaja ptušačka ŭ naźvie profilu značyć, što karystalnik «aficyjna» paćvierdziŭ svaju asobu. Pra novaŭviadzieńnie paviedamiŭ u minułuju niadzielu jaje vykanaŭčy dyrektar Mark Cukierbierh.
Pasłuha padpiski, spačatku razhornutaja ŭ Novaj Ziełandyi i Aŭstralii, z hetaha tydnia kaštuje 11,99 dołara na miesiac dla veb-viersij abo 14,99 dołara dla iOS i Android. Meta dazvolić karystalnikam paćviardžać svaju asobu z dapamohaj vydadzienych uradam paśviedčańniaŭ asoby. Kampanija zajaviła, što pasłuha pa padpiscy taksama budzie prapanoŭvać «pavialičanuju bačnaść i achop», palepšanuju abaronu ad vypadkaŭ, kali karystalniki vydajuć siabie za inšych asob, i niepasredny dostup da klijenckaj słužby padtrymki.
Jak paviedamlaje vydańnie Techcrunch, dachody Meta paciarpieli ŭ apošnija hady paśla ŭviadzieńnia kampanijaj Apple strohich źmien pryvatnaści ŭ iOS, jakija skaracili zdolnaść sacyjalnych sietak adsočvać dziejnaść karystalnikaŭ u internecie. Meta, jakaja zarablaje amal usie svaje hrošy na rekłamie, zajaviła ŭ minułym hodzie, što taki krok Apple budzie kaštavać kampanii Cukierbierha bolš čym 10 miljardaŭ dalaraŭ stračanaha dachodu ad rekłamy ŭ 2022 hodzie.
Uviadzieńnie pasłuhi padpiski stanovicca papularnym krokam siarod kampanij, jakija vałodajuć sacyjalnymi sietkami. Tak sacyjalnaja płatforma Snap u minułym hodzie zapuściła svaju ŭłasnuju słužbu padpiski, z dapamohaj jakoj jana ŭžo pieratvaryła bolš za miljon karystalnikaŭ u płatnych klijentaŭ. Hetak ža Iłan Mask abnaviŭ słužbu padpiski Twitter: ciapier Twitter Blue budzie prapanoŭvać šerah dadatkovych funkcyj, uklučajučy siniuju ptušačku. Za apošnija miesiacy Twitter pašyryŭ Twitter Blue na bolš čym tuzin rynkaŭ, uklučajučy Indyju i Indanieziju. Ale pakul, pa stanie na siaredzinu studzienia, tolki kala 180000 akaŭntaŭ padpisalisia na Twitter Blue.
Mask, zaŭziaty krytyk servisaŭ Facebook, robić staŭku na pieratvareńnie Twitter Blue ŭ asnoŭny faktar dachodu dla sietki, jakuju jon nabyŭ u minułym hodzie za 44 miljardy dołaraŭ. Utrapiony miljarder raskrytykavaŭ papiaredniuju ideju vieryfikacyi tolki asobnych akaŭntaŭ, śćviardžajučy, što funkcyja pavinna być adkrytaja dla ŭsich. Tyja, chto atrymaŭ siniuju ptušačku biez padpiski na Twitter Blue, u rešcie rešt straciać jaje, zajaŭlaŭ jon raniej.
Siniaja ptušačka ŭžo daŭno źjaŭlajecca adnoj z žadanych funkcyj na płatformach sacyjalnych sietak. Raniej hety znak byŭ zareziervavany dla hramadskich dziejačaŭ: palitykaŭ, akcioraŭ, muzykaŭ, spartsmienaŭ, žurnalistaŭ i h. d.
Tym časam u Meta paśpiašalisia supakoić karystalnikaŭ chacia b na pieršy čas. «Pakul my ŭsio praviarajem i vyvučajem, nie budzie nijakich źmien va ŭlikovych zapisach Instagram i Facebook, jakija ŭžo prajšli vieryfikacyju na asnovie papiarednich patrabavańniaŭ, uklučajučy sapraŭdnaść i viadomaść», — zajavili ŭ Meta.
Kampanija Meta, čyje akcyi narešcie vyraśli za apošnija niekalki tydniaŭ, ciapier pieražyvaje nie najlepšyja časy z-za žorstkaj reakcyi rynkaŭ na jaje hrandyjoznaje bačańnie «mietasuśvietu», jaki jana namahajecca stvaryć. Kampanija, jakaja zvolniła kala 11000 supracoŭnikaŭ za apošnija dva miesiacy, paabiacała skaracić svaje vydatki na ambitny prajekt; i na hetym fonie paviedamlajecca pra jašče adno zvalnieńnie nieŭzabavie.