Napiaredadni svajho 30-hodździa pierastała viaščać radyjo «Bi-Ej». Jano zbankrutavała
Radio BA nie pracuje ŭžo dziesiać dzion, zaŭvažyła Tochka.by. Taksama ŭ efir nie vychodziać «Miełodyi stahodździa», jakija naležać toj ža jurydyčnaj asobie. Heta źviazana z bankructvam apošniaj.
20.02.2023 / 20:14
Najstarejšaja pryvatnaja radyjostancyja Biełarusi ŭ FM-dyjapazonie — Radio BA — zbankrutavała. Pra heta partału Tochka.by stała viadoma ź niekalkich krynic, znajomych ź situacyjaj.
Mahčyma, radyjo na zvykłaj častacie paśla znoŭ zapracuje, ale ŭžo ź inšym ułaśnikam i imiem. Ale jak chutka heta adbudziecca — nieviadoma. Jość niuansy, jakija ciapier sprabujuć vyrašyć: toje, što nazyvajecca sprečkaj haspadarčych subjektaŭ.
Pa niekatorych źviestkach, daŭhi kampanii vykupiła hałoŭnaje haspadarčaje ŭpraŭleńnie Kiraŭnictva spravami Łukašenki.
Prablemy ŭ BA uźnikli jašče na pačatku pandemii karanavirusa, kali prykmietna asieŭ rynak rekłamadaŭcaŭ i, adpaviedna, prybytak, jaki nie pierakryvaŭ vydatki, u pryvatnaści, na arendu pamiaškańniaŭ.
Pieršaja pryvatnaja radyjostancyja «Radyjo Bi-Ej» zapracavała 24 sakavika 1993 hoda i stała pieršaj pryvatnaj biełaruskaj stancyjaj u FM-dyjapazonie. Zasnavalnikam vystupiła biełaruska-amierykanskaje pradpryjemstva «Bi Ej Internešnł». U 1990-ja «Radyjo Bi-Ej» było vielmi paśpiachovym i bahatym. U 1998-m pradpryjemstva adkryła svoj načny kłub «Juła», jaki chutka zdabyŭ papularnaść siarod moładzi, a ŭ 2000-ch adkryŭ i afilavanuju radyjostancyju «Miełodyi stahodździa».