U Minsku sudziać Paŭła Biełavusa. Sud zrabili zakrytym
U Minskim haradskim sudzie siońnia raspačynajecca sud nad palitźniavolenym zasnavalnikam kramy Symbal.bu i kulturnickim mieniedžaram Paŭłam Biełavusam. Jaho abvinavačvajuć pavodle čatyroch artykułaŭ Kryminalnaha kodeksa, u tym liku za «zdradu dziaržavie» (č. 1 art. 356 KK). Jamu pahražaje da 15 hadoŭ pazbaŭleńnia voli. Sud zrabili zakrytym.
20.02.2023 / 10:22
Praces viadzie sudździa Žanna Brysina.
Pieršapačatkova sud byŭ u adkryty, ale na samym pačatku sudovaha pasiadžeńnia dziaržaŭny abvinavaŭca zajaviŭ chadajnictva ab razhladzie spravy ŭ zakrytym režymie «z metaj praduchileńnia razhałošvańnia infarmacyi, raźmieščanaj u krynicach, pryznanych ekstremisckimi».
Jak paviedamlaŭ na pačatku studzienia były načalnik upraŭleńnia Śledčaha kamiteta pa Minsku Siarhiej Pasko, u 2011 hodzie «abvinavačany dla pošuku adnadumcaŭ pačaŭ tranślavać patrebnuju jamu infarmacyju ŭ masy».
«Pad vyhladam kulturna-histaryčnaha raźvićcia ŭ roznych ahulnadastupnych sacyjalnych sietkach i na sajtach jon raspaŭsiudžvaŭ idei biełaruskaha nacyjanalizmu, metaj jakich źjaŭlałasia źmiena dziaržaŭnaj ułady ŭ Biełarusi. Abvinavačany zarehistravaŭsia ŭ jakaści indyvidualnaha pradprymalnika i zasnavaŭ tavarystva z abmiežavanaj adkaznaściu (krama pa anłajn- i afłajn-prodažy tavaraŭ), paśla čaho pačaŭ pravodzić roznyja masavyja mierapryjemstvy».
«Stvoranyja biznes-prajekty adkryli pradprymalniku novyja mahčymaści. Pakolki Biełaruś zaŭsiody znachodziłasia ŭ centry ŭvahi na palityčnaj arenie, chutka znajšlisia tyja, chto byŭ hatovy spansiravać raźvićcio jaho antydziaržaŭnaj dziejnaści. Fihurant padpisaŭ nie mienš za 12 dahavoraŭ z roznymi zamiežnymi pradstaŭnikami i kampanijami. Z tych časoŭ ekstremisckaja dziejnaść na terytoryi Biełarusi nabyvała novyja abaroty dziakujučy ŭlivańniam z-za miažy».
«Śledstvam ustanoŭlena, što abvinavačany ŭ intaresach zamiežnych arhanizacyj dla najchutčejšaj źmieny dziaržaŭnaj ułady stymulavaŭ varožaść suajčyńnikaŭ u dačynieńni da Radzimy. Svaimi złačynnymi dziejańniami Pavieł Biełavus na praciahu dziesiaci hadoŭ staviŭ pad pahrozu źniešniuju i ŭnutranuju biaśpieku dziaržavy. Za heta jon atrymaŭ ad zamiežnych sponsaraŭ bolš za $150 tys., 50 tys. jeŭra i 40 tys. złotych».
Pa vynikach rasśledavańnia Biełavusu vystaŭlenaje abvinavačańnie pa nastupnych artykułach Kryminalnaha kodeksa:
— č. 1 art. 356 (zdrada dziaržavie);
— č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak);
— č. 3 art. 361 (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś);
— č. 1 art. 361-1 (kiraŭnictva ekstremisckim farmavańniem).
Na majomaść Paŭła Biełavusa nakłali aryšt na ahulnuju sumu bolš za 50 tysiač rubloŭ.