Abjadnany pierachodny kabiniet apublikavaŭ spravazdaču za paŭhoda pracy
Abjadnany pierachodny kabiniet Biełarusi vydaŭ spravazdaču za 6 miesiacaŭ svajoj pracy. U joj adlustravanyja dasiahnieńni ŭ halinach mižnarodnych adnosin, adnosin z Ukrainaj, farmavańni siłavoha błoka, sankcyjnaha cisku na režym, kryminalnaha pieraśledu asobaŭ, adkaznych za represii i saŭdzieł u ahresii suprać Ukrainy, dapamohi palitviaźniam, nacyjanalnaj kultury i adukacyi.
09.02.2023 / 20:01
U halinie mižnarodnych spraŭ adznačajecca, što za hety čas padrychtavany makiet ahulnahramadzianskaha pašparta novaj Biełarusi i viaducca pieramovy ab mižnarodnym pryznańni takoha dakumienta, udałosia dabicca stvareńnia Radaj Jeŭropy Kantaktnaj hrupy Rady Jeŭropy pa adnosinach ź Biełaruśsiu. Pačali pracu misija demakratyčnaj Biełarusi ŭ Brusieli i pradstaŭnictva demakratyčnaj Biełarusi ŭ Prazie, a taksama pavialičanaja dapamoha Jeŭrasajuza dla hramadzianskaj supolnaści Biełarusi na nastupny hod.
Ź Ministerstvam unutranych spraŭ Litvy ŭzhodnienaja pracedura paćviardžeńnia Kabinietam biełaruskaha hramadzianstva i historyi pieraśledu asobaŭ, jakija stracili biełaruski pašpart abo nie mohuć praciahnuć termin jaho dziejańnia. Vypracavanaja ramačnaja pazicyja pa novym hieapalityčnym vybary Biełarusi.
Što tyčycca Ukrainy, to pradstaŭniki Kabinieta naviedvali jaje z pracoŭnymi vizitami, naładzili stałaje supracoŭnictva ź dziaržaŭnymi ŭstanovami Ukrainy pa profilnych kirunkach dziejnaści, pryniali ŭdzieł u biełaruska-ŭkrainskim forumie ŭ Lvovie. Taksama pradstaŭnik Kabinieta pa zamiežnych spravach uzhadniŭ z Nacyjanalnym bankam Ukrainy ałharytm sproščanaj padačy zajavak na razbłakiroŭku rachunkaŭ biełaruskich hramadzian va ŭkrainskich bankach.
Dla siłavoha błoka adznačajecca, što pradstaŭnik pa abaronie i nacyjanalnaj biaśpiecy Valeryj Sachaščyk pačaŭ realizacyju płana materyjalna-techničnaha zabieśpiačeńnia biełaruskich dobraachvotnikaŭ, jakija vajujuć va Ukrainie. Bajpołam u niekalkich haradach Polščy i Litvy byli stvoranyja Charuhvy, pačało pracavać «Paspalitaje rušeńnie» Sachaščyka.
Akramia taho, pradstaŭnictva pa adnaŭleńni zakonnaści i pravaparadku padrychtavała hrupy śpiecyjalnaha pryznačeńnia i adkarektavała płan «Pieramoha» z ulikam novych hramadska-palityčnych abstavin. Akramia taho, viałosia roznymi sposabami infarmavańnie zamiežnaj hramadskaści pra represii ŭ Biełarusi i inšyja złačynstvy režymu.
Kabiniet sfarmavaŭ i abhruntavaŭ pazicyju ab nieabchodnaści harmanizacyi sankcyj u dačynieńni da Rasii i režymu Łukašenki i razasłaŭ jaje jeŭračynoŭnikam i pradstaŭnikam zachodnich uradaŭ. Taksama jon vypracavaŭ prapanovy pa pašyreńni sankcyjnych śpisaŭ i ŭdaskanaleńni sankcyjnaha cisku.
Pradstaŭnik pa tranzicie ŭłady nakiravaŭ zvaroty ŭ dziaržaŭnyja orhany ŭłady Litvy, Čechii, Ukrainy z abhruntavańniem nieabchodnaści pryznańnia KDB i HUBAZiK terarystyčnymi arhanizacyjami, i da ich prysłuchalisia.
Taksama pradstaŭnictvam pa tranzicie ŭłady padrychtavanaje abhruntavańnie mahčymaści pryciahnieńnia da adkaznaści pradstaŭnikoŭ režymu Łukašenki za parušeńnie Kanviencyi suprać katavańniaŭ 1984 hoda.
Byŭ zapuščany prajekt «Kadravy rezierv dla novaj Biełarusi» dla padrychtoŭki nieabchodnych kvalifikavanych kadraŭ dla tranzitnaha pieryjadu. Apracavana 170 zajavak na navučańnie, 17% ź jakich padali asoby, jakija pracujuć u dziaržaŭnym siektary. Sfarmavany płan piłotnaj adukacyjnaj prahramy.
U śfiery dapamohi palitźniavolenym raspačali pracu pa stvareńni mižnarodnaha Fondu dla reabilitacyi represavanych, taksama vypracavanaja pazicyja i raspačataja padrychtoŭka da mahčymych pieramoŭ z režymam pa pytańni vyzvaleńnia palitźniavolenych.
U śfiery nacyjanalnaj kultury i adukacyi Kabiniet damoviŭsia, što Polšča dalej budzie pryznavać biełaruskija dypłomy i paśviedčańni ab adukacyi, atrymaŭ zhodu na stvareńnie sietki biełaruskich škoł vychadnoha dnia na terytoryi Polščy, dabiŭsia, kab pry zaličeńni biełaruskich studentaŭ u polskija VNU byli sproščanyja patrabavańni ab pradastaŭleńni dakumientaŭ.
Polskija ŭłady pahadzilisia na prapanovu Kabinieta pašyryć padtrymku represavanych biełaruskich nastaŭnikaŭ, vykładčykaŭ i navučencaŭ, a taksama pryniataje rašeńnie pra stvareńnie sumiesnaj rabočaj hrupy Kabinieta i Ministerstva adukacyi i navuki Polščy dla stałaha supracoŭnictva.
U supracoŭnictvie ź biełaruskimi kulturnickimi arhanizacyjami zasnavany Instytut biełaruskaj knihi, jaki budzie vyrašać zadačy pa raźvićci biełaruskaj knižnaj spravy nasupierak represiŭnym zachadam režymu, taksama stvoranyja pracoŭnyja hrupy, jakija zajmajucca raspracoŭkaj tranzitnaha pieryjadu ŭ adukacyi dla novaj Biełarusi.