Чарговую аблаву ГУБАЗіК правёў у Лепелі
«Віцебская вясна» паведамляе, што ў Лепелі днямі «папрацаваў» віцебскі ГУБАЗіК сумесна з супрацоўнікамі АМАПа.
05.02.2023 / 15:18
Фота ілюстрацыйнае
Сілавікі наведаліся дадому як мінімум да шасці чалавек. У некаторых былі праведзеныя ператрусы. Частка людзей была дастаўленая ў мясцовы РАУС і з імі былі праведзеныя прафілактычныя гутаркі.
Але, як пішуць сілавікі ў сваім канале, дадому вярнуліся ў той дзень не ўсе. Некаторыя засталіся ў Лепельскім ІЧУ, на іх завялі адміністрацыйныя справы.
Як стала вядома, сярод схопленых быў і малады чалавек з інваліднасцю. Яго Лепельскі суд аштрафаваў на 720 беларускіх рублёў быццам за распаўсюд экстрэмісцкіх матэрыялаў. Маці хлопца на суд не пусцілі, сказалі, што суд будзе на наступны дзень, але ён адбыўся ў той жа самы.
Паводле сведчання сваякоў аштрафаванага, малады чалавек ні ў якіх акцыях не ўдзельнічаў, не посціў і не лайкаў навіны з нібыта «экстрэмісцкіх каналаў». Адно што толькі ў сваім сяброўскім асяродку ён выказваўся супраць вайны, якую развязала Расія ва Украіне.