«Prostyja słovy» Michała Aniempadystava — pieśnia našych dvarovych pratestaŭ. Novaje VIDEA na kanale Andreja Chadanoviča
Michał Aniempadystaŭ — heta nie tolki aŭtar «Prostych słoŭ», a jašče i znakamity paet, dyzajnier, kulturołah, mastak, fatohraf. Čarhovy vypusk na jutub-kanale Andreja Chadanoviča pryśviačajecca dniu pamiaci vialikaha biełarusa, jaki 5 hadoŭ tamu adyšoŭ u lepšy śviet.
23.01.2023 / 19:20
U vypusku aŭtar raskazvaje:
- čamu Aniempadystaŭ źjaŭlajecca čałaviekam epochi biełaruskaha adradžeńnia;
- jak paet staŭ adnym z zasnavalnikaŭ biełaruskaha dyzajnu;
- za što prysudžajecca premija imia Michała Aniempadystava;
- jak hučyć lubimy vierš kłasika;
- kniha Michała Aniempadystava «Prostyja słovy» — pra što jana;
- jakija mianuški byli ŭ Aniempadystava ŭ vojsku z-za jaho składanaha proźvišča.
Voś niekalki dumak ź videa:
Niekatoryja ź iraničnych i vostrasatyryčnych vieršaŭ z «Narodnaha alboma» pierastali być śmiešnymi. Jak my rahatali pry kancy 90-ch ź niaŭmiełaha kłoŭna Alaksandra Łukašenki, jak my zubaskalili z nahody jaho trasianki, z nahody jaho savieckaj nastalhii, z nahody jaho palityčnych pretenzij zrabicca vaładarom abjadnanaj ź Biełaruśsiu Rasii. Jak heta siońnia pierastała być śmiešnym, i zrabiłasia jašče i baluča. U čas, kali biełaruski režym zrabiŭsia maryjanietkavym dadatkam da ahresiŭnaj impieryi, a Biełaruś pieratvaryłasia ŭ prachadny dvor dla rasijskaj uzbrojenaj nabrydzi.
Časam sumna da śloz, jak los, jak sama chałodnaja skraźniakovaja rečaisnaść zabiraje samyja ciopłyja i haračyja sercy, jakija rabili i robiać Biełaruś biełaruskaj. Ź inšaha boku, pryjemna razumieć, što Michał Aniempadystaŭ sa schavanaha hieroja druhoha płana, kali tvoj uniosak bačać pa vynikach tvajoj pracy, ale nie atajasamlivajuć heta z taboj, pieratvarajecca ŭ lehiendarnuju i kultavuju postać.
Biełarus ź jaho ŭtulnaściu byćcia ŭ centry lehiendarnaha prajekta «Narodny albom». Słuchajučy pra «chleb na stale» i «połymia ŭ piečy», šmat chto z nas ujaŭlaje babulinu chatu i prymiervaje na siabie svaje dziciačyja ŭspaminy. Michał paradaksalna haradžanin u n-ym pakaleńni i nikoli nie mieŭ takoj babulinaj chaty, kab pryjazdžać na vakacyi, tamu, jak «Prostyja słovy», tak i ŭvieś «Narodny albom» — heta vydumany aŭtaram mif, heta kulturałahičnaje daśledavańnie našaha miesca na pamiežžy pamiž vialikimi dziaržavami, što hatovyja nas pahłynuć.
Biełarusy, biezumoŭna, vytrymajuć usie skraźniaki, tamu što, jak pisaŭ sam Michał Aniempadystaŭ: «Usio budzie dobra. Dzień pryjdzie novy». Hladzim razam novaje videa Andreja Chadanoviča, stavim padabajki, kamientujem i dzielimsia ź siabrami i siabroŭkami.