Źmianili praviły vydačy lhotnych kredytaŭ na navučańnie ŭ VNU
Saŭmin pryniaŭ pastanovu ab vydačy lhotnych kredytaŭ na navučańnie ŭ biełaruskich VNU. Dakumient apublikavany na Nacyjanalnym pravavym internet-partale i nazyvajecca «Ab rehulavańni pytańniaŭ u śfiery adukacyi, nadańni subsidyj i finansavańni raschodaŭ arhanizacyj».
23.01.2023 / 18:32
Atrymać ilhotny kredyt na navučańnie zmohuć tolki tyja biełarusy, jakija atrymlivajuć pieršuju vyšejšuju adukacyju. Jaho mohuć atrymać studenty-płatniki dzionnaj formy navučańnia ŭ dziaržaŭnych VNU, VNU spažyvieckaj kaapieracyi i VNU Fiederacyi prafsajuzaŭ.
Aformić kredyt možna ŭ Biełarusbanku tolki paśla pastupleńnia, pryčym nie tolki na samoha studenta, ale i na adnaho ź jaho baćkoŭ, kali toj maje pastajanny dachod.
Žyvyja hrošy na ruki vydavać nie buduć — bank prosta pieraličyć ich na rachunak VNU.
Jość umova: dla atrymańnia kredytu siaredni dachod na kožnaha člena siamji na praciahu papiaredniaha hoda nie pavinien pieravyšać 350% biudžetu pražytačnaha minimumu, heta značyć, nie vyšej za 1189 rubloŭ.
Staŭka pa lhotnym kredycie — 50% staŭki refinansavańnia. Z 23 studzienia pamier staŭki refinansavańnia — 11,5%, i atrymlivajecca, što kredyt na navučańnie vydajecca pad 5,75%. Jašče stolki ž banku pakryvaje dziaržava.
Važnaja ŭmova: kali studenta adličvajuć, to kredyt pryjdziecca viarnuć na praciahu hoda. Pryčym pra lhotu ŭ 50% havorka tady ŭžo nie idzie, treba addavać pa pracentach udvaja bolšuju sumu i na praciahu miesiaca paśla adličeńnia.
Što tyčycca hrantaŭ, to jany buduć dastupnyja tolki dla zamiežnych hramadzian abo asob biez hramadzianstva. Pretendenty na ich buduć vybiracca pa vynikach śpiecadboru.