U centry Minska znoŭ adčyniajecca viadomy rok-kłub
Infarmacyja pra chutkaje adkryćcio TNT źjaviłasia ŭ instahramie. Rok-kłub ź dziesiacihadovaj historyjaj budzie pracavać pa raniejšym adrasie — na Revalucyjnaj, 9a. Novyja ŭładalniki raspaviali, čamu nie atrymałasia adkrycca letaś, jak abiacali adrazu, piša Realt.by.
11.01.2023 / 11:29
Fota: instagram.com/tntrockclub
Paviedamleńnie pra toje, što rok-kłub TNT sychodzić na vakacyi, źjaviłasia ŭ instahramie ŭ lipieni 2022 hoda.
— Kab viarnucca z novymi siłami i praciahnuć rabić toje, što robim užo dziesiać hadoŭ, — udakładniali tady ŭładalniki.
Adkrycca znoŭ płanavali da novaha hoda. Kali hetaha nie adbyłosia, padpisčyki zachvalavalisia. Stali abmiarkoŭvać, što bar začynieny ŭžo dosyć doŭha, źjaviłasia navat infarmacyja, što na miescy TNT adkryjecca inšaja ŭstanova, ale jana nie paćvierdziłasia. U kancy śniežnia ŭ instahramie źjaviŭsia post z navinoj, što kłub viartajecca, a ciapier u storys patłumačyli pryčynu, čamu kanikuły zaciahnulisia.
— My na finišnaj pramoj. TNT trapiŭ da nas u kastryčniku, i my dumali, što adkryjemsia da novaha hoda, ale my i padumać nie mahli, kolki tam treba budzie zrabić pracy, kab jon zmoh znoŭ vydatna funkcyjanavać paśla 10 hadoŭ bieśpierabojnaha rok-n-roła. Ujavicie mašynu, jakuju 10 hadoŭ nie vazili na TA, — praviali paralel novyja ŭładalniki.
Zaraz u rok-kłubie zakančvajecca ramont, a na voknach nalepki z nadpisam coming soon. U storys pakazali, što abnaŭlajuć pamiaškańnie kuchni i barnuju stancyju. Akramia hetaha, u kłubie zaraz adkryty niekalki vakansij: u kamandu šukajuć administratara, aficyjanta i myjščyka posudu.
TNT pracavaŭ u Minsku z 2012 hoda. Rok-bar adkryŭ viadomy biznesmien Valeryj Šumski. Jon staŭ viadomy ŭ kancy 90-ch, kali kampanija «Jukoła», jakuju jon kantralavaŭ, stała adnym z najbujniejšych pradaŭcoŭ aŭtamabilaŭ u Biełarusi. U partfieli «Jukoła» aŭtamabili Ford, Nissan, matacykły Harley-Davidson, Kawasaki i inšyja. U siaredzinie 2000-ch Šumski pradaŭ «Jukoła-aŭta» kampanii «Atłant-M», jakaja isnuje dahetul, a sam syšoŭ u naftavuju śfieru. U Rasii ŭ biznesmiena było niekalki kampanij, siarod jakich «Jukoła-nafta».
Šumski byŭ zaŭziatym kalekcyjanieram: jaho zbor naličvaje niekalki dziasiatkaŭ retraaŭtamabilaŭ, a kalekcyju viniłavych płaścinak nazyvajuć samaj darahoj u Biełarusi. Jašče Šumski źbiraŭ hitary i aŭtohrafy muzykaŭ. Častka muzyčnych atrybutaŭ ź jaho kalekcyj zachoŭvałasia ŭ TNT — ubačyć ich mahli ŭsie achvotnyja.
U 2020 hodzie Valeryj Šumski pamior na ŠVŁ z-za karanavirusa. Jamu było 60 hadoŭ.