Trahikamiedyja ŭ Mahilovie: načalnik DAI paździekavaŭsia z mera za toje, što toj paździekavaŭsia ź jaho
Historyja vyśviatleńnia adnosin śviežapryznačanaha mera Mahilova i načalnika abłasnoj DAI stała pradmietam naśmiešak u asiarodździ čynoŭnikaŭ i milicyjanieraŭ. Sprečka «chto hałoŭny?» vyliłasia ŭ trahikamiedyju.
03.01.2023 / 15:53
Alaksandr Studnioŭ, staršynia Mahiloŭskaha harvykankama
Jak stała viadoma «Našaj Nivie», dva łukašenkaŭskija čynoŭniki nie razabralisia, chto ź ich «bolš hałoŭny» i pieratvaryli pošuk adkazu na hetaje pytańnie ŭ cyrk.
Havorka idzie pra novaha staršyniu mahiloŭskaha harvykankama Alaksandra Studniova, jakoha Łukašenka pryznačyŭ na pasadu 3 kastryčnika 2022-ha — da taho jon byŭ na anałahičnaj pasadzie ŭ Babrujsku.
Inšy ŭdzielnik historyi — padpałkoŭnik milicyi Viktar Ratčankoŭ.
Jon taksama «varah» i da svajho pryznačeńnia načalnikam DAI Mahiloŭskaj vobłaści słužyŭ namieśnikam načalnika DAI Minskaj vobłaści.
Ratčankova ŭ Mahiloŭ pryznačyli letam 2020-ha — na toj momant u Mahilovie nie było načalnika DAI, bo papiaredni zaŭčasna pamior.
U novym dla siabie horadzie Ratčankoŭ prasłužyŭ bolš za Studniova.
Viktar Ratčankoŭ
I voś, jak paviedamlajuć krynicy «Našaj Nivy», paśla pryznačeńnia novaha mera Ratčankoŭ zachacieŭ paznajomicca ź im asabista i pryjechaŭ u harvykankam, ale byŭ niepryhoža «adšyty».
Kažuć, što Ratčankaŭ pasprabavaŭ sustrecca sa staršyniom harvykankama biez papiaredniaj damoŭlenaści — i jaho nie pryniali.
Zamiest pryjomu jon atrymaŭ rekamiendacyju trymać subardynacyju i zapisvacca na pryjom zahadzia, a nie prychodzić pa svaim žadańni.
Pry hetym farmalna Ratčankoŭ uznačalvaje DAI UUS abłvykankama i nie padparadkoŭvajecca kiraŭniku horada.
Što było dalej?
«Na nastupny dzień niepadalok ad vykankama stajaŭ ekipaž DAI, jaki spyniŭ mašynu novaha mera. Na pytańnie «Ci vy viedajecie, kaho vy spyniajecie?» inśpiektar adkazvaŭ niešta kštałtu «Viedaju, tamu i spyniaju». Paśla pryniźlivych pracedur pravierki dakumientaŭ Studniovu vypisali štraf za taniroŭku škła i prymusili adździrać taniroŭku na miescy», — paviedamiła «Našaj Nivie» abaznanaja krynica.
Imavierna, paśla hetaha dva pradstaŭniki łukašenkaŭskaj sistemy ŭsio ž pahavaryli.
Cikava, što Ratčankoŭ staŭ adnym z «ludziej hoda Mahiloŭščyny» pa viersii sistemy.